Kazachskija vajskoŭcy pry zadušeńni pratestaŭ nasili formu miratvorcaŭ AAN. Arhanizacyja zaniepakojenaja
Kazachstanskija vajskoŭcy padčas zadušeńnia pratestaŭ u krainie vykarystoŭvali błakitnyja kaski miratvorčych siłaŭ AAN, što było vidać na fotakartkach, apublikavanych Associated Press. «Radyjo Azatyk» (kazachskaje adździaleńnie «Radyjo Svaboda») vyśvietliła, što adbyvałasia, u Ministerstva abarony Kazachstana.
Pradstaŭnik kazachstanskaha Ministerstva abarony paviedamiŭ, što vajskoŭcy ŭ błakitnych kaskach — heta častka bataljona KAZBAT, jaki supracoŭničaŭ z AAN. Adnak jany nie majuć prava nasić formu miratvorcaŭ biez adpaviednaj sankcyi z boku AAN.
AAN ža nie ŭvodziła svajho miratvorčaha kantynhientu na terytoryju Kazachstana. Tudy na prośbu prezidenta krainy Kasym-Žamarta Takajeva adpravilisia tolki 2600 miratvorcaŭ Arhanizacyi Damovy ab kalektyŭnaj biaśpiecy. Da AAN jany nie majuć nijakaha dačynieńnia.
AAN užo vykazała zaniepakojenaść hetym faktam. «Krainy, jakija pradstaŭlajuć AAN-kantynhient vajskoŭcaŭ i palicejskich, pavinny ŭžyvać simvoliku AAN tolki ŭ tych vypadkach, kali havorka idzie pra vykanańnie mandata miratvorcaŭ AAN i ŭdzieł u miratvorčych apieracyjach AAN, zaćvierdžanych Savietam biaśpieki», — padkreśliŭ pres-sakratar arhanizacyi Stefan Dziužaryk.
Ci budzie heta mieć dla Kazachstana niejkija inšyja nastupstvy, aprača zaniepakojenaści — pakul nieviadoma.
Błytaninu vakoł «błakitnych kasak» u Ałmaty jašče bolš uzmacnili fota i videa, jakija źjavilisia 9 studzienia ŭ biełaruskich dziaržaŭnych ŚMI, na jakich vidać, jak biełaruskija vajskoŭcy nosiać narukaŭnyja znački, jakija, jak niekatoryja śćviardžali, źjaŭlajucca madyfikavanymi znakami adroźnieńnia Arhanizacyi Abjadnanych Nacyj.
Ale nieŭzabavie vyśvietliłasia, što na samaj spravie hety znak adroźnieńnia naležyć biełaruskaj «miratvorčaj rocie». Pa dyzajnu jon amal identyčny znaku Arhanizacyi Abjadnanych Nacyj, jaki pakazvaje Paŭnočnaje paŭšarje ŭ asiarodździ viankoŭ, što simvalizuje śviet. Da biełaruskich znakaŭ adroźnieńnia dadadzienyja skryžavanyja miačy za paŭśfieraj. Biełaruskaje miratvorčaje padraździaleńnie słužyła raniej siarod inšaha ŭ Livanie.
Kamientary