ES nie budzie nakiroŭvać misiju dla nazirańnia za refierendumam u Biełarusi
Jeŭrasajuz nie źbirajecca nakiroŭvać naziralnikaŭ u Biełaruś na refierendum pa ŭniasieńni źmianieńniaŭ u kanstytucyju, jaki pavinien prajści 27 lutaha, paviedamiŭ aficyjny pradstaŭnik jeŭrapiejskaj źniešniepalityčnaj słužby Piter Stana.
«My kanstatavali, što biełaruskija ŭłady nie zaprasili Biuro pa demakratyčnych instytutach i pravach čałavieka ABSIE razharnuć misiju pa nazirańni ŭ Biełarusi. ES, sa svajho boku, taksama nie płanuje nakiroŭvać aficyjnuju misiju pa nazirańni za hałasavańniem u Biełaruś», — skazaŭ Stana.
Pry hetym jon adznačyŭ, što hramadzianie Jeŭrasajuza mohuć adpravicca ŭ hetuju krainu dla nazirańnia za refierendumam, ale «buduć rabić heta ŭ pryvatnym paradku».
ES, pa słovach Stana, praciahnie sačyć za raźvićciom padziej. «My praciahniem adsočvać raźvićcio padziej u Biełarusi da refierendumu i ŭ dzień hałasavańnia i adpaviedna adreahujem», — skazaŭ jon.
Pavodle apošnich danych CVK, kamisijami pa refierendumie ŭžo akredytavanyja 39 909 nacyjanalnych naziralnikaŭ. Bolšaść naziralnikaŭ (29 336) pradstaŭlajuć hramadskija abjadnańni: prafiesijnyja sajuzy, jakija ŭvachodziać u FPB (8906), BRSM (4674), «Biełaja Ruś» (4628), «Biełaruski sajuz žančyn (3903).
Palityčnyja partyi nakiravali ŭ kamisii pa refierendumie 1557 naziralnikaŭ, bolšaść ź ich (989) — ad Kamunistyčnaj partyi Biełarusi.
Pracoŭnyja kalektyvy nakiravali 3370 naziralnikaŭ, hramadzianie — 5646.
Akramia taho, Centralnaj kamisijaj akredytavany 101 mižnarodny naziralnik. 92 pradstaŭlajuć misiju naziralnikaŭ ad SND, u tym liku 14 nakiravanyja Mižparłamienckaj Asamblejaj dziaržaŭ — udzielnic SND, taksama 8 naziralnikaŭ akredytavanyja ad centralnych vybarčych kamisij Azierbajdžana, Armienii, Rasii, Tadžykistana, 1 — ad Šanchajskaj arhanizacyi supracoŭnictva, piša Zerkalo.io.
Kamientary