U Hrodnie paśla zvarotu prarasijskaj aktyvistki zakryli mastackuju halereju «400 kvadrataŭ»
U mai ŭ halerei «400 kvadrataŭ» paśla adnaho dnia pracy zakryli vystavu sučasnaj skulptury. Pryčynaj staŭ zvarot aktyvistki Volhi Bondaravaj. Hetaja padzieja supała z zakančeńniem damovy arendy z handlova-zabaŭlalnym centram (HZC). Pa słovach pradstaŭnika halerei, centr nie zachacieŭ jaje praciahvać.
«Ja vykazvaju padziaku za hod paśpiachovaha supracoŭnictva z administracyjaj Triniti. Vielmi škada, što davodzicca zakryvać pryhožy prajekt, jaki prynosiŭ šmat radaści žycharam horada, — raspavioŭ pradstaŭnik halerei Hrodna.life. — My staralisia pryvozić aktualnyja vystavy i pravodzić mierapryjemstvy dla žycharoŭ horada na dabračynnaj asnovie».
Halereja praisnavała hod. Tam prajšła vystava-amaž, pryśviečanaja pamierłamu Zacharu Kudzinu. U halerei vystaŭlaŭsia mastak Alaksandr Bałdakoŭ. Prachodziła retraśpiektyŭnaja vystava mastaka-ilustratara Paŭła Tatarnikava.
Što zdaryłasia?
Padčas płanavańnia vystavy ci inšaha masavaha mierapryjemstva arhanizatar padaje zajaŭku minimum za dva tydni da pačatku ŭ administracyju horada, raspavioŭ pradstaŭnik halerei. Hetak ža jon zrabiŭ i dla vystavy «Skulptura». Adnak u zajaŭcy byŭ niapoŭny pieralik aŭtaraŭ, bo da apošniaha momantu skład udzielnikaŭ mianiaŭsia «u suviazi z navinami ŭ našaj krainie i ŭ susiedziaŭ». Kuratar vystavy — Ivan Arcimovič — byŭ zajaŭleny adrazu.
«Adrazu ž paśla adkryćcia vystavy spadarynia Bondarava adpraviła zvarot u harvykankam z prośbaj ab zakryćci vystavy, bo adzin ź jaje ŭdzielnikaŭ, jon ža kuratar, nibyta nie adpaviadaje jaje ŭjaŭleńniam ab pravilnaj hramadzianskaj pazicyi i ŭsia vystava nibyta nie adpaviadaje ŭjaŭleńniam ab pryhožym spadaryni Bondaravaj. Hety zvarot i niapoŭny śpis udzielnikaŭ vystavy stali farmalnaj pryčynaj dla prypynieńnia jaje pracy i nakiravańnia kamisii z administracyi horada. Kamisija prapanavała źniać bolšuju častku rabot, usumniŭšysia ŭ ich mastackaj vartaści», — raspavioŭ pradstaŭnik.
Jak heta sprabavali vyrašyć?
«Biełaruski sajuz mastakoŭ» padaŭ list administracyi i byŭ hatovy stvaryć ekśpiertnuju kamisiju ź viadomych mastactvaznaŭcaŭ i skulptaraŭ. Adnak hetaja prapanova, pa słovach pradstaŭnika, nie była pačutaja administracyjaj. Tady jon z kurataram pryniali rašeńnie ab zakryćci vystavy.
«Pakolki ŭ vystavie prymali ŭdzieł pryznanyja skulptary, kurataram i halerejaj była praviedzienaja vialikaja praca nad kancepcyjaj, nad celnaściu ekspazicyi, my vyrašyli, što pakidać napałovu zrezany prajekt nižej za našu hodnaść», — ličyć jon.
Hetaja vystava stała apošniaj u halerei — damovu arendy nie praciahnuli. Raniej ab pryčynach zakryćcia vystavy «Skulptura» ni harvykankam, ni pradstaŭniki HZC nie stali havaryć z redakcyjaj.
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?49
Kamientary