Premiju ad Fondu Džordža Kłuni ŭručyli biełaruskim pravaabaroncam
Premiju «The Albie Awards 2022», zasnavanuju Fondam «Kłuni za spraviadlivaść», u naminacyi «Spraviadlivaść dla abaroncaŭ demakratyi» ŭručyli biełaruskaj pravaabarončaj arhanizacyi «Viasna».
Uznaharodu dla «Viasny» pryniała Alina Stefanovič — žonka palitźniavolenaha pravaabaroncy Valancina Stefanoviča. Jana adznačyła, što na scenie pavinien byŭ by stajać jaje muž, ale «jon nie moža hetaha zrabić, tamu što znachodzicca za kratami».
Alina taksama začytała list ad Valancina, jaki jon paprasiŭ ahučyć na cyrymonii. U liście Valancin Stefanovič piša pra toje, što i ŭ «XXI stahodździ biełarusy vymušanyja zmahacca za, zdavałasia b, takuju prostuju reč — demakratyju», a taksama nahadvaje pra svaich kaleh, jakija ciapier znachodziacca ŭ źniavoleńni ŭ Biełarusi. Zakončyŭ svajo pasłańnie Valancin Stefanovič słovami biełaruskaha kłasika Maksima Bahdanoviča: «Biełaruś, tvoj narod dačakajecca załacistaha jasnaha dnia».
Džordž Kłuni ŭ efiry telekanała CBS napiaredadni ŭručeńnia premii skazaŭ:
«Hetyja ludzi z hatoŭnaściu trapili ŭ turmu, tamu što vieryli nastolki ćviorda, zmahalisia za niezaležnaść, zmahalisia za demakratyju. Jany sapraŭdnyja hieroi».
Premija «The Albie Awards» uručajecca ŭpieršyniu. Jana nazvanaja ŭ honar sudździ Ałbi Saksa, viadomaha svaim hieraičnym imknieńniem pakončyć z aparteidam u Paŭdniova-Afrykanskaj Respublicy. Premija zasnavanaja z metaj pryciahnuć uvahu da biasstrašnych ludziej, jakija zmahajucca za spraviadlivaść, niahledziačy na vialikuju ryzyku.
U śviatočnaj cyrymonii ŭ Ńju-Jorku ŭziali ŭdzieł śpievaki i śpiavački, aktory, aktrysy, biznesmeny i madeli — u tym liku, Džulija Robierts, Merył Stryp, Džon Olivier, Dua Lipa, Džon Krasinski, Sindzi Kroŭfard.
Ciapier čytajuć
Achviary intehracyi. Rasija biaspłatnymi pucioŭkami i praz Rassupracoŭnictva zavablivaje biełaruskich dziaciej20
Kamientary