Kanstytucyjny sud Hruzii słuchaje spravu ab impičmiencie prezidentu Zurabišvili

Zajavu deputataŭ ab mahčymym parušeńni Kanstytucyi prezidentam padajuć čatyry členy parłamienta, u tym liku i staršynia kiroŭnaj partyi Iraklij Kabachidze.

Sama prezident na pasiadžeńnie suda, jakoje prachodzić u Batumi, nie pajechała.

U «Hruzinskaj mary» ličać, što pajezdki Zurabišvili parušali 52-ty artykuł Kanstytucyi Hruzii, pavodle jakoha prezident viadzie pieramovy i vykonvaje pradstaŭničyja paŭnamoctvy ŭ zamiežnapalityčnych adnosinach sa zhody kabinieta.

Metaj vizitaŭ u jeŭrapiejskija krainy i sustreč ź jeŭrapiejskimi lidarami prezident nazyvaje jeŭrapiejskuju intehracyju Hruzii i atrymańnie Hruzijaj statusu kandydata ŭ ES. Zajavy jeŭrapiejskich lidaraŭ, ź jakimi sustrakałasia Zurabišvili, heta paćviardžajuć.

Ale ŭ kiroŭnaj partyi kažuć pra advarotnaje. «Hruzinskaja mara» abvinavačvaje prezidenta ŭ sabatažy nacyjanalnych intaresaŭ krainy i pieraškodzie atrymańniu statusu kandydata ŭ ES, jaki Hruzija, u adroźnieńnie ad Małdovy i Ukrainy, nie atrymała letam minułaha hoda.

Rašeńnie nakont atrymańnia Hruzijaj statusu čakajecca da kanca hetaha hoda. Da hetaha svaju acenku i rekamiendacyi pavinna pradstavić Jeŭrapiejskaja kamisija.

Udar pa jeŭraintehracyi?

Zvarot u Kanstytucyjny sud z patrabavańniem abviaścić impičmient prezidentu za parušeńnie Kanstytucyi padpisali 80 deputataŭ.

Kali sud pahodzicca i dakaža, što prezident sapraŭdy parušyła Kanstytucyju, praces pieramieścicca ŭ parłamient. U hetym vypadku na praciahu dvuch tydniaŭ paśla sudovaha zaklučeńnia pavinna prajści hałasavańnie pa pytańni ab adchileńni Zurabišvili ad pasady.

Ale ŭ tym, što impičmient budzie daviedzieny da kanca, sumniavajucca navat sami inicyjatary pracesu, bo dla hetaha treba nie mienš za dźvie traciny hałasoŭ poŭnaha składu parłamienta (heta značyć, padtrymka impičmientu z boku pa mienšaj miery 100 deputataŭ). U parłamienckaj bolšaści ciapier tolki 84 deputaty.

Bolšaja častka apazicyjanieraŭ, u tym liku deputaty samaj bujnoj apazicyjnaj partyi «Adziny nacyjanalny ruch», abiacajuć prahałasavać suprać adchileńnia ad pasady Zurabišvili abo zusim nie ŭdzielničać u hałasavańni. U apazicyi ŭpeŭnienyja, što zapusk impičmientu napiaredadni pastanovy ab nadańni Hruzii statusu kandydata ŭ Jeŭrapiejski Sajuz — nie vypadkovaść.

«Heta sabataž jeŭrapiejskaha kursu Hruzii, heta sabataž — asabliva ŭ momant, kali my čakajem statusu kandydata, i našy mižnarodnyja partniory sočać za kožnym krokam hruzinskich uładaŭ. Nijakaj pravavoj padstavy dla pačatku impičmientu prezidenta nie isnuje», — zajaviła napiaredadni słuchańniaŭ u Kanstytucyjnym sudzie deputatka najbujniejšaj apazicyjnaj partyi «Adziny nacyjanalny ruch» Ana Cytlidze.

Z tym, što razhlad impičmientu moža pieraškodzić jeŭrapiejskaj intehracyi Hruzii, zhadžajucca i ŭ hramadzianskim siektary. Tut nahadvajuć, što, zhodna z Kanstytucyjaj Hruzii, jak prezident, tak i ŭrad abaviazany prymać usie miery dla intehracyi krainy ŭ ES.

«Vyklikaje tryvohu toje, što ŭrad nie tolki ihnaruje hety abaviazak, ale i pieraškadžaje prezidentu Hruzii — kanstytucyjnamu orhanu — realizavać histaryčny vybar našaha naroda. Pieraškoda jeŭrapiejskaj intehracyi jakraz i ŭjaŭlaje saboj parušeńnie Kanstytucyi», — havorycca ŭ sumiesnaj zajavie, jakuju raspaŭsiudzili adzinaccać niaŭradavych arhanizacyj z nahody pastanovy kiroŭnaj partyi pačać praceduru impičmientu Zurabišvili.

Jak pakazvajuć apytańni, absalutnaja bolšaść nasielnictva Hruzii vystupaje za budučyniu krainy ŭ NATA i ES.

• 0
• 0
• 0
• 0
• 0
• 0
• 5
• 0