Vyznačany 10 partyj i supołak, jakija buduć reprezientavać Biełaruś u Jeŭraneście

Biełaruskaja delehacyja ŭ Parłamienckaj asamblei palityki ES «Uschodniaje partniorstva» (Jeŭraniest) budzie składacca tolki z pradstaŭnikoŭ apazicyi i hramadzianskaj supolnaści. Pra heta ŭ intervju BiełaPAN 13 sakavika paviedamiŭ polski deputat, kiraŭnik delehacyi Jeŭraparłamienta pa suviaziach ź Biełaruśsiu Jacek Pratasievič.

Pavodle jaho słoŭ, 10 sakavika členy delehacyi Jeŭraparłamienta ŭ Jeŭranieście pa vynikach vizitu ŭ Minsk aficyjnaj misii Jeŭraparłamienta, jaki prajšoŭ 25—27 lutaha, pryniali rašeńnie ab składzie biełaruskaj delehacyi.

«Paśla taho jak biełaruskija ŭłady adchilili prapanavanuju formułu składu delehacyi «5+5» (5 členaŭ Pałaty pradstaŭnikoŭ i 5 členaŭ apazicyi),

my vyrašyli, što zaprašajem 10 pradstaŭnikoŭ apazicyi i hramadzianskaj supolnaści. U ich nie budzie prava hołasu, ale jany buduć mieć prava vystupać na pasiadžeńniach», — skazaŭ Pratasievič.

Jon rastłumačyŭ, što 11 sakavika na sustrečy staršyni Jeŭraparłamienta Ježy Buzieka z kiraŭnikami piaci parłamienckich frakcyj Jeŭraparłamienta było vyznačana prypynić vykanańnie rašeńnia ab składzie biełaruskaj delehacyi. Pry hetym u ŚMI źjaviłasia niapravilnaja traktoŭka hetaj padziei, dzie kazałasia, što rašeńnie ab składzie biełaruskaj delehacyi ŭ Jeŭranieście adkładziena na miesiac. Adnak, jak padkreśliŭ Pratasievič, rašeńnie niaźmiennaje, adkładziena tolki data, kali jano budzie abjaŭlena aficyjna.

«Heta było zroblena nie tamu, što mahčymyja niejkija źmianieńni, a tamu, što spadar Buziek

žadaje pravieści kansultacyi z kiraŭnikami parłamientaŭ usich krain — udzielnic Uschodniaha partniorstva, aprača Biełarusi,

— patłumačyŭ Pratasievič. — Hetaja sustreča zapłanavana na 24 sakavika. Spadar Buziek zaprosić ich u Brusiel dla taho, kab jašče raz zajavić ab ćviordaj pazicyi Jeŭraparłamienta pa Biełarusi, a taksama dla kansultacyj ab dalejšym raźvićci Jeŭraniesta».

Pratasievič zaznačyŭ, što skład biełaruskaj delehacyi ŭ Jeŭranieście ŭžo zaćvierdžany.

U jaje ŭvojduć pradstaŭniki Abjadnanaj hramadzianskaj partyi, Partyi BNF, Biełaruskaj partyi levych «Spraviadlivy śviet», ruchu «Za Svabodu», Biełaruskaj sacyjał-demakratyčnaj Hramady, hramadzianskaj inicyjatyvy «Rada biełaruskaj intelihiencyi», a taksama pradstaŭniki Biełaruskaha sajuza žurnalistaŭ, Biełaruskaha kanhresa demakratyčnych prafsajuzaŭ, hramadskaha abjadnańnia «Ekadom» i nieaficyjnaha Sajuza palakaŭ na Biełarusi.

«Delehacyja Jeŭraparłamienta ŭ Jeŭranieście pryniała svajo rašeńnie, skład biełaruskaj delehacyi zaćvierdžany i nijakich źmianieńniaŭ nie čakajecca. Taksama nie čakajecca nijakich źmianieńniaŭ u rašeńni ab tym, što pradstaŭniki biełaruskaha parłamienta nie buduć brać udzieł u pracy Jeŭraniesta», — padkreśliŭ Jacek Pratasievič.

• 0
• 0
• 0
• 0
• 0
• 0
• 0
• 0