Propaviedź Z-baciuški i reabilitacyja Paŭlika Marozava. Jak u Śviata-Jelisaviecinskim manastyry vučać padletkaŭ patryjatyzmu

Dzieci z hranatamiotam

U siaredzinie lutaha 2025 hoda na sajcie Śviata-Jelisaviecinskaha manastyra (SIEM) źjaviłasia zaprašeńnie ŭsim achvotnym uziać udzieł u «siamiejna-patryjatyčnym forumie z udziełam viadomych śpikieraŭ». Mierapryjemstva prymierkavali da 23 lutaha, jano prachodziła pad łozunham «Vychavajem patryjotaŭ — abaronim Ajčynu!».

Pa słovach arhanizataraŭ — pravasłaŭnaha ruchu «Arlaniaty» — jaho prahrama ŭpieršyniu ŭklučaje ŭ siabie «suvoraŭskija hulni» dla staršakłaśnikaŭ — spartyŭnyja, stratehičnyja, intelektualnyja spabornictvy, jakija taksama prachodzili ŭ ścienach manastyra.

Telehram-kanał «Chryścijanskaja vizija» apublikavaŭ fota i videa, zroblenyja ŭ pieršy dzień forumu. Na ich całkam ekipiravanyja ŭ vajskovuju formu (kaski, broniekamizelki) dzieci pazirujuć užo nie tolki z aŭtamatami, ale taksama z kulamiotami i navat aŭtamatyčnym stankovym hranatamiotam. Na padstavie zdymkaŭ u telehram-kanale niemahčyma śćviardžać, sapraŭdnaja heta zbroja ci tolki jaje makiety. Taksama na stale lažyć dron i pult kiravańnia da jaho.

Zdymki byli zroblenyja 22 lutaha, u dzień startu «suvoraŭskich hulniaŭ», u anonsie jakich skazana, što jany pravodziacca «z metaj vychavańnia lubovi da svajoj Radzimy, farmiravańnia razumieńnia maładym pakaleńniem kaštoŭnaści zachavańnia histaryčnaj pamiaci, a taksama raskryćcia spartyŭnaha i tvorčaha patencyjału padletkaŭ».

Na praktycy jany ŭjaŭlajuć saboj vajskova-patryjatyčnyja spabornictvy padletkavych kamand z roznych haradoŭ Biełarusi, padčas jakich jany spaborničajuć u stralbie, pieraciahvajuć kanat, hulajuć u šachmaty i zajmajucca armreślinham.

Pavialičyć

Čempijon pa kołcy droŭ

U ramkach forumu junym udzielnikam było taksama prapanavana pasłuchać vystupleńni zaprošanych śpikieraŭ. Siarod ich «Vot tak» vyjaviŭ ijereja Dźmitryja Novikava, nastajaciela prychoda chrama Śviaciciela Mikałaja Cudatvorca ŭ Salihorsku, jaki raskazaŭ padletkam pra vychavańnie siły voli praz sport.

Viadomaść hetamu śviataru pryniesła nie tolki jahonaje zachapleńnie hirami, ale i zakliki da ŭdziełu ŭ daterminovym hałasavańni na niadaŭnich prezidenckich vybarach u Biełarusi. Udzieł u vybarach u roliku, źniatym na vybarčym učastku, jon nazvaŭ «važnym krokam da pośpiechu našaj krainy», a samo hałasavańnie, jakoje prachodziła va ŭmovach represij i cisku na vybarščykaŭ — «dobraj spravaj».

U jakaści matyvacyjnaha prykładu jon nazvaŭ baćkoŭ Isusa Chrysta, jakija ŭdzielničali ŭ pierapisie nasielnictva ŭ Staražytnaj Judei — «u dziaržaŭnym žyćci krainy», jak padkreśliŭ Novikaŭ. Tamu, pavodle jaho słoŭ, i chryścijanie pavinny «prystupić da hałasavańnia».

Jašče adzin śpikier, jaki vystupiŭ na pravasłaŭnym forumie, — dyrektar Baraŭlanskaha lashasa Alaksandr Miranovič, — «prasłaviŭsia» ŭdziełam u demantažy sotniaŭ kryžoŭ u Kurapatach u 2019 hodzie.

Padletkam kiraŭnik lashasa, jaki arhanizuje majstar-kłasy Łukašenki pa kołcy droŭ i pieramahaje ŭ respublikanskim pieršynstvie ŭ naminacyi «kołka droŭ pa-prezidencku», raskazaŭ, «što značyć być patryjotam».

Paśla Miranoviča da mikrafona vyjšaŭ duchoŭnik moładzievaha adździeła BPC protaijerej Aleh Abramovič. Jon viadomy svaimi rehularnymi vizitami ŭ siłavyja struktury i praviadzieńniem u ich ścienach relihijnych cyrymonij. U sakaviku 2024 hoda Abramovič uziaŭ udzieł u śviatkavańni 107-hodździa biełaruskaj milicyi, a taksama ŭ forumie vieteranaŭ vajskovaj raźviedki.

Pavialičyć

U padpiskach Abramoviča na jaho asabistaj staroncy «Ukantakcie» razam z pravasłaŭnymi supolnaściami — šerah staronak, jakija prapahandujuć «ruski śviet» i padtrymlivajuć ahresiju suprać Ukrainy (naprykład, «Rośsija — eto ja!, «ZAVGOR», «Viežlivyje ludi», «Biesohon»), a taksama staronki eratyčnaha źmiestu.

U stužcy jon rehularna repościć hetyja i inšyja resursy, vykazvajučy svaju padtrymku vajnie va Ukrainie i vyśmiejvajučy praciŭnikaŭ Alaksandra Łukašenki. Padletkam i ich baćkam 23 lutaha jon raskazvaŭ pra «chatniuju carkvu».

Prykład Paŭlika Marozava

Na zakančeńnie druhoha dnia mierapryjemstva ŭdzielnikam forumu i hulniaŭ prapanavali pahladzieć niekalki dakumientalnych filmaŭ. Adzin ź ich — «Patryjatyčnaje vychavańnie ŭ Rasii». «Vot tak» znajšoŭ u internecie tolki adzin film z takoj nazvaj. Jon raźmieščany na fiederalnym partale historyi Rasii (istorija.rf) — «hałoŭnym histaryčnym partale krainy».

U paŭhadzinnym videa historyk Śviatłana Čudzinava raskazvaje pra patryjatyčnaje vychavańnie dziaciej i padletkaŭ u Rasijskaj Impieryi i Savieckim Sajuzie.

Cikavaść u kantekście pravasłaŭnaha charaktaru mierapryjemstva vyklikajuć charaktarystyki, jakija ŭ dakumientalnym filmie dajucca savieckamu pieryjadu, u jakim dziciača-junackija arhanizacyi byli aktyŭna zadziejničanyja ŭ hanieńniach na carkvu. Praŭda, pra hety aśpiekt dziejnaści pijanieraŭ Čudzinava pramaŭčała.

Zatoje jana faktyčna reabilitavała Paŭlika Marozava, viadomaha tym, što danios uładam na svajho baćku, jaki nibyta dapamahaŭ «kułakam».

«Pijaniery dapamahali darosłym i ŭ baraćbie z kontrrevalucyjaj. Siarod pijanieraŭ-hierojaŭ pieršaje miesca zaŭsiody zajmaŭ Paŭlik Marozaŭ. Pavodle aficyjnaj viersii, jon danios na svajho baćku, što toj dapamahaŭ kułakam chavać zbožža i chavacca ad zakona. Paśla hetaha Paŭlika i jahonaha małodšaha brata najbližejšyja svajaki zabili. Historyja dosyć składanaja i zabłytanaja… Ale toje, što ździejśniŭ Paŭlik — heta ŭčynak nie zdradnika, a čałavieka, jaki chacieŭ prynieści karyść svajoj krainie», — adznačyła Čudzinava na fonie vizualnaha šerahu z prapahandysckich płakataŭ i fatahrafij dziaciej sa Stalinym i Brežnievym.

Pavialičyć

Arlaniaty patryjarchatu

«Arlaniaty» byli stvoranyja niepasredna pry manastyry ŭ mai 2021 hoda. Na sajcie ruchu paznačana, što pieršy źlot adbyŭsia 15 maja 2021 hoda i byŭ pryśviečany «800-hodździu z dnia naradžeńnia śviatoha dabraviernaha kniazia Alaksandra Nieŭskaha».

Jadrom «Arlaniat» stali vychavancy niadzielnaj škoły pry manastyry i stvoranaj jaho manaškami pravasłaŭnaj škoły «Ichvis». Na pieršym ža źlocie dziaciej navučali nie tolki biblejskim «łahodnaści i pakory», ale taksama zborcy i razborcy aŭtamataŭ, padrychtoŭcy da stralby i akazańni pieršaj dapamohi paranienym.

Tradycyja atrymała praciah i na nastupnych mierapryjemstvach dziciača-junackaha ruchu. Naprykład, u vieraśni 2022 hoda hościem «Arlaniat» staŭ kiraŭnik biełaruskaha vajskova-patryjatyčnaha centra «Kazačy spas» Piatro Šapko, viadomy supracoŭnictvam z byłym «ministram abarony DNR» Iharam Strałkovym-Hirkinym, viarboŭkaj bajevikoŭ va Ukrainu i arhanizacyjaj vajsova-patryjatyčnych łahieraŭ dla dziaciej va ŭzroście 14-18 hadoŭ na terytoryi Biełarusi.

Na fotazdymkach z adnaho ź mierapryjemstvaŭ «Arlaniat» Šapko dzieci i padletki na terytoryi manastyra zaniatyja zborkaj i razborkaj aŭtamatyčnaj zbroi.

U chodzie siamiejna-patryjatyčnaha forumu 23 lutaha 2025 hoda Šapko vystupiŭ ź lekcyjaj «Vychavańnie chłopčykaŭ i ŭpłyŭ kamfortnaha žyćcia na ŭsprymańnie štodzionnaj realnaści».

24-25 lutaha minułaha hoda ŭ manastyrskim centry «Kaŭčeh» adbyłasia arhanizavanaja «Arlaniatami» hulnia dla padletkaŭ, padčas jakoj udzielniki hulali z sapraŭdnaj zbrojaj na fonie vyviešanaha ŭ duchoŭna-aśvietnickim centry vialikaha partreta Stalina.

Pavialičyć

Akramia hetaha, «Arlaniaty» ŭ siłu svaich mahčymaściaŭ udzielničajuć i ŭ padtrymcy rasijskaj ahresii suprać Ukrainy. Naprykład, u krasaviku 2023 hoda stała viadoma, što biełaruskich dziaciej i padletkaŭ słužycieli Śviata-Jelisaviecinskaha manastyra pryciahnuli da napisańnia listoŭ «u suciašeńnie ruskim voinam». 

• 1
• 4
• 0
• 4
• 0
• 0
• 12
• 0