U Hiermanii padarvali viežy najstarejšaj atamnaj elektrastancyi krainy

Apieracyja pa padryvie pačałasia a 12:00 pa miascovym časie, piša vydańnie Bild.

Dźvie bietonnyja viežy vyšynioj pa 160 mietraŭ akuratna asieli na svaich miescach ź nievialikim pramiežkam u časie.

Dla hetaha było praburana bolš za tysiaču adtulin pad vybuchoŭku. Techničnyja padrabiaznaści padryvu inžyniery abiacajuć raskryć tolki paśla zaviaršeńnia apieracyi.

Padryŭ hradzirniaŭ staŭ samym bačnymi etapam znosu stancyi, jakaja kančatkova spyniła pracu ŭ kancy 2021 hoda ŭ miežach niamieckaj prahramy pa admovie ad atamnaj enierhietyki.

Za apošnija hady z terytoryi abjekta ŭžo vyvieźli kala 4700 ton budaŭničych materyjałaŭ, a ciapier płanujuć źniščyć jašče 56 tysiač ton žalezabietonu, jaki paśla budzie pierapracavany ŭ druz i inšyja vidy syraviny.

Simvał niamieckaj atamnaj enierhietyki

Atamnaja elektrastancyja Hundreminhien, raźmieščanaja ŭ akruzie Hiuncburh u Bavaryi, była adnoj z klučavych dla raźvićcia jadziernaj enierhietyki FRH. Mienavita tut u 1966 hodzie byŭ zapuščany pieršy bujny reaktar krainy.

Usiaho stancyja mieła try błoki: A, B i C. Błok A pracavaŭ z 1966 pa 1977 hod i staŭ pieršaj bujnoj atamnaj ustanoŭkaj Hiermanii. Paśla surjoznaha incydentu ŭ 1977 hodzie jaho bolš nie zapuskali, i ŭ 1983 hodzie było pryniata rašeńnie pra poŭny demantaž. Heta dało kaštoŭny dośvied u śfiery razboru i ŭtylizacyi radyjeaktyŭnych materyjałaŭ.

Błoki B i C, pabudavanyja ŭ 1980‑ch hadach, byli identyčnyja pa kanstrukcyi i mahutnaści — kala 1280 miehavat kožny. Jany zabiaśpiečvali da 30% usioj elektraenierhii Bavaryi. Błok B byŭ spynieny ŭ 2017 hodzie, a błok C — u kancy 2021-ha, staŭšy apošnim kipiačym voda-vadzianym reaktaram, što dziejničaŭ u Hiermanii.

Zakryćcio i demantaž

Na terytoryi stancyi ŭ 2006 hodzie adkryłasia śpiecyjalnaje schovišča dla adpracavanaha jadziernaha paliva. U im mohuć zachoŭvacca da 192 kantejnieraŭ, umacavanych bietonam taŭščynioj da 85 sm. Choć praciŭniki budaŭnictva vykazvali strach, što heta schovišča moža stać pastajannym, sud adchiliŭ ich skarhi.

Siońnia padryŭ hradzirniaŭ staŭ simvaličnym finałam historyi Hundreminhiena — abjekta, jaki bolš za paŭstahodździa simvalizavaŭ atamnuju epochu Hiermanii. Paśla zaviaršeńnia razbureńnia i pierapracoŭki materyjałaŭ terytoryja budzie całkam ačyščana i pieradadziena pad inšyja mety.

Pryčyny i nastupstvy

Hiermanija admoviłasia ad atamnaj enierhietyki z-za spałučeńnia hramadskaha strachu paśla Čarnobyla i Fukusimy, palityčnaha cisku z boku ekałahičnych ruchaŭ i stratehii «Energiewende» — pierachodu da adnaŭlalnych krynic.

Pad upłyvam partyi «Zialonyja» i šyrokich pratestaŭ urad pryniaŭ rašeńnie spynić pracu ŭsich AES, ličačy ich niebiaśpiečnymi i maralna sastarełymi.

Choć siońnia mnohija ekśpierty adznačajuć, što heta pryviało da pavieličeńnia zaležnaści ad vuhalu i hazu, a atamnaja enierhietyka ciapier ličycca adnoj z samych čystych, bolšaść niemcaŭ usio jašče padtrymlivaje rašeńnie i nie bačyć viartańnia da jadziernaj enierhietyki.

• 3
• 0
• 0
• 5
• 3
• 0
• 0
• 0