75‑hadovy śviatar pierabiahaŭ vaśmipałosnuju trasu pad Minskam — i zahinuŭ pad kołami «Falksvahiena»
Protaijerej Uładzimir Badziulkin vyrašyŭ nie spuskacca ŭ padziemny pierachod, jaki znachodziŭsia litaralna za niekalki mietraŭ ad miesca trahiedyi.
Adbyłosia ŭsio ŭviečary 21 krasavika na 23‑m kiłamietry darohi R-1 «Minsk — Dziaržynsk». 75‑hadovy śviatar nie staŭ spuskacca ŭ padziemny piešachodny pierachod, jaki byŭ pobač, a pasprabavaŭ pierasiekčy trasu R-1 z boku Fanipala (u rajonie aŭtobusnaha prypynku) u bok vioski Čečyna. U hetym miescy za košt pałasy razhonu trasa stanovicca ažno vaśmipałosnaj.
Uładzimira źbiła 25‑hadovaja minčanka, jakaja na «Folksvahien Holf 6» jechała ŭ bok stalicy.
Dziaržynski rajonny adździeł Śledčaha kamiteta raspačaŭ kryminalnuju spravu pa č. 2 art. 317 KK (parušeńnie pravił darožnaha ruchu, jakoje paciahnuła pa nieaściarožnaści śmierć čałavieka. Maksimalna mahčymaje pakarańnie dla kiroŭcy — 5 hadoŭ chimii. Ale heta ŭ vypadku, kali dziaŭčynu pryznajuć vinavataj).
Uładzimir Badziulkin naradziŭsia ŭ Śvietłahorsku. Skončyŭ Minskuju duchoŭnuju sieminaryju. Byŭ žanaty, u jaho dźvie dački.
U 1990 hodzie staŭ spačatku dyjakanam.
Z 1990 pa 1992 hod słužyŭ u kliry prychoda chrama miranosicy roŭnaapostalnaj Maryi Mahdaliny horada Minska, u 1992‑1994 hadach byŭ nastajacielem prychoda chrama Naradžeńnia Praśviatoj Baharodzicy ŭ siale Siarhiejevičy Puchavickaha rajona Minskaj vobłaści.
U 1994 hodzie Uładzimira nakiravali na słužeńnie ŭ Fanipal. Tam jon zasnavaŭ i pabudavaŭ chram Ušeścia Haspodniaha.
U 2006 hodzie Badziulkin byŭ uźviedzieny ŭ san protaijereja. Z 2014 hoda staŭ klirykam novastvoranaj Maładziečanskaj jeparchii.
Sioleta ŭ studzieni Uładzimir pa stanie zdaroŭja faktyčna pajšoŭ na piensiju — staŭ zaštatnym klirykam Maładziečanskaj jeparchii.
Raźvitalisia ź im 23 krasavika — u tym samym chramie ŭ Fanipali, jaki Uładzimir zasnavaŭ.
Kamientary
Jak heta dziŭna: parušaŭ jon, a buduć sudzić jaje (