«Interfaks»: Biełaruś i Rasija na parozie novaj naftavaj vajny

Situacyja dazvalaje «prahnazavać čarhovaje abvastreńnie dvuchbakovych [biełaruska-rasiejski'] adnosinaŭ na pačatku nastupnaha hoda, što moža vyklikać časovaje prypynieńnie pastavak nafty u Biełaruś z RF i navat prypynieńnie tranzitu rasijskaj nafty pa terytoryi respubliki», piša «Interfaks-Zachad».

Reč u tym, što termin dziejańnia padpisanaha 27 studzienia 2010 hoda mižuradavaha biełaruska-rasijskaha pratakołu ab handli naftaj skančajecca 31 śniežnia hetaha hoda. I baki nie dasiahnuli prahresu ŭ pieramovach ab jaho prałanhacyi, kanstatujuć aŭtary.

Na siońnia abmiarkoŭvajucca dva varyjanty.

Patrabavańni biełaruskaha boku sioleta dosyć ścipłyja. Minsk choča prałanhavać miechanizm 2011 hoda, ale pavialičyć kvotu biazmytnych pastavak nafty ŭ Biełaruś z 6,3 młn ton da 6,7 młn ton.

Rasijski bok, u asobie namieśnika ministra finansaŭ Siarhieja Šatałava, publična prapanavaŭ zamianić myty na naftu dla Biełarusi ekspartnymi mytami na biełaruskija naftapradukty, jakija buduć pieradavacca ŭ rasijski biudžet. Ciapier takija myty ŭ Biełarusi adsutničajuć.

Pryčym Rasija pretenduje navat na myty ad ekspartu nafty, zdabyvanaj u Biełarusi, a taksama na myty ad ekspartu naftapraduktaŭ ź luboj inšaj nafty, za vyniatkam vieniesuelskaj.

U svaju čarhu, «biełaruski bok zhodny pieradavać u rasijski biudžet tolki vyvaznyja myty ad ekspartu naftapraduktaŭ, vyrablenych z rasijskaj nafty», — painfarmavaŭ surazmoŭca.

Razychodžańni miž pazicyjami takija značnyja, što pryjści da kampramisu da Novaha hoda budzie składana.

Praŭda, Biełaruś raźličvaje na hety raz mieć padstrachoŭku ŭ vyhladzie nafty ź Vieniesueły i takim čynam uratavać svaje dva naftapierapracoŭčyja zavody ad spynieńnia.

Ź inšaha boku,

situacyja paharšajecca tym, što z 1 studzienia ŭvojdzie ŭ dziejańnie ŭ probnym režymie naftapravod BTS-2 u abychod Biełarusi.

Miž tym u 2009 hodzie praź sistemu mahistralnych naftaprovadaŭ «Družba» praź Biełaruś prapampavali amal 80 młn ton nafty. Heta było adnoj z važnych krynic dachodu nacyjanalnaha biudžetu.

Ahiencyja «Interfaks» časta atrymlivaje źviestki z krynic u Administracyi prezidenta i śpiecsłužbach. U časy papiarednich enierhietyčnych vojnaŭ z Rasijaj jana davała bolš apieratyŭnuju i vyčarpalnuju infarmacyju, čym inšaje łukašenkaŭskaje ahienctva BiełTA.

Surazmoŭca «Interfaksa» miarkuje, što «pieramovy pa tranzitnych taryfach buduć ciažkimi i praciahłymi i naŭrad ci zavieršacca da kanca hoda. U hetaj suviazi Biełaruś i Rasija mohuć ŭstupić u 2011 hod, nie majučy pravavych umoŭ pastaŭki nafty ŭ Biełaruś i jaje transpartavańnia pa terytoryi respubliki».

Krynica na viersie ŭłady miarkuje, čto rašeńnie prablemy ŭrešcie budzie vyniesiena na najvyšejšy ŭzrovień.

• 0
• 0
• 0
• 0
• 0
• 0
• 0
• 0