Łukašenka spadziajecca na azierbajdžanskuju naftu

Alaksandr Łukašenka prapanoŭvaje pastaŭku azierbajdžanskaj nafty ŭ Biełaruś pa svop-schiemie. Pra heta jon paviedamiŭ 19 listapada ŭ Minsku padčas sustrečy z prezidentam Dziaržaŭnaj naftavaj kampanii Azierbajdžana Raŭnaham Abdułajevym.

«My razhladajem lubyja varyjanty supracoŭnictva z Azierbajdžanam pa vuhlevadarodnaj syravinie. Ja maju na ŭvazie pastaŭki ŭ Biełaruś azierbajdžanskaj nafty pa svop-schiemie (zamiaščajučy vieniesuelskuju naftu, jakaja budzie pradavacca na amierykanskim rynku)», — cytuje Łukašenku jaho pres-słužba.

«Ja dumaju, pakul my pabudujem u siabie zavody pa razredžvańni pryrodnaha hazu, Azierbajdžan budzie na ŭźbiarežžy Hruzii ci Rasii zvadkoŭvać hety pryrodny haz, jak heta robić Katar. I my z zadavalnieńniem budziem atrymlivać u vas pryrodny haz», — zaznačyŭ kiraŭnik dziaržavy, dadaŭšy, što heta bolš vyhadna, čym kuplać u «Hazproma».

«My siońnia viadziem našy pieramovy nie suprać kahości, a raźvivajem supracoŭnictva pa ekanamična vyhadnych prajektach, — skazaŭ prezident. — Ja maju na ŭvazie pastaŭki ŭ Biełaruś, na našy naftapierapracoŭčyja zavody, azierbajdžanskaj nafty, my heta nie ŭtojvajem, pierš za ŭsio, pa svop-schiemie. Vy vyjhrajacie dziasiatki dołaraŭ na adnoj tonie, my taksama vyjhrajem. Ja dumaju, heta całkam naturalna. Razmova idzie ab prapampoŭvańni vašaj nafty na našy zavody pa naftapravodzie Adesa — Brody z vychadam na «Družbu».

Pry hetym Łukašenka padkreśliŭ, što biełaruski bok hatovy razhladać lubyja varyjanty supracoŭnictva z Azierbajdžanam pa vuhlevadarodnaj syravinie. Hetaja tema, pavodle jaho słoŭ, nieadnarazova abmiarkoŭvałasia z prezidentam Azierbajdžana. «Ilcham Hiejdaravič narmalna da hetaha stavicca, i, dumaju, nadyšoŭ toj čas, kali my pavinny zrabić niekalki krokaŭ napierad», — miarkuje biełaruski prezident.

Na jaho dumku, takoje supracoŭnictva budzie vyhadnaje i Azierbajdžanu. «Ale kali nie damovimsia, my ŭsio roŭna budziem kuplać naftu na takich ža ŭmovach u basiejnach Mižziemnaha, Čornaha moraŭ, jašče dzieści i pa zamiaščeńni, pa svop-schiemie, budziem pastaŭlać u Biełaruś, — skazaŭ Łukašenka. — A dla svajoj nafty, jakuju my zdabyvajem u Vieniesuele i jakuju kuplajem, znojdziem kampaniju, jakaja budzie na rynki Amieryki, Paŭnočnaj Amieryki pastaŭlać». «Ale my chacieli b, kab my heta rabili sa svaimi siabrami», — padkreśliŭ kiraŭnik dziaržavy.

U svaju čarhu Raŭnah Abdułajeŭ zaznačyŭ, što pytańni pavieličeńnia tavaraabarotu i pastavak pa schiemie svopa ŭžo abmiarkoŭvalisia azierbajdžanskim bokam. «My dobra papracavali i znajšli rašeńnie», — cytuje kiraŭnika naftavaj kampanii pres-słužba biełaruskaha prezidenta.

• 0
• 0
• 0
• 0
• 0
• 0
• 0
• 0