«Reparciory bieź miežaŭ»: Biełaruś padazrajecca ŭ cenzuravańni internetu

Arhanizacyja «Reparciory bieź miežaŭ» apublikavała vyniki daśledavańnia svabody vykazvańnia ŭ internecie. U śpis vorahaŭ internetu trapili Kitaj, Iran, Paŭnočnaja Kareja, Siryja, Vjetnam. Siarod krain, jakija padazrajucca ŭ varožaści — Biełaruś, Rasija i Francyja.

«Kožny treci karystalnik internetu ŭ śviecie nie maje svabodnaha dostupu da sieciva. U 60 krainach cenzurujecca internet i ŭ roznaj stupieni pieraśledujucca jaho karystalniki. Jaknajmienš 119 čałaviek ciapier znachodziacca ŭ turmie za vykazvańnie svaich pohladaŭ u siecivie, — havorycca ŭ dakładzie. — Hetyja ličby vyklikajuć tryvohu».

«Reparciory bieź miežaŭ» apublikavali 100-staronkavy dakład ab svabodzie vykazvańnia ŭ internecie ŭ 10 krainach, jakija ličylisia «vorahami internetu» i ŭ 16 krainach, jakija zastajucca pad nazirańniem z-za ich sumnieŭnaj palityki ŭ hetaj halinie.

Represiŭnyja režymy časta ŭžyvajuć roznyja sposaby kantrolu ŭ internecie — cenzuru, «pasadki» kibierdysidentaŭ u turmy i prapahandu.

Tunis i Jehipiet byli vydalenyja ź śpisu vorahaŭ internetu paśla krachu svajho ŭrada. Hetyja krainy, adnak, zastajucca pad nazirańniem, jak i Livija.

Pad nahladam zastajucca i demakratyčnyja krainy: Aŭstralija, Paŭdniovaja Kareja i Francyja. Heta źviazana z roznymi mierami, skiravanymi na abmiežavańnie svabody vykazvańnia mierkavańniaŭ i dostupu da sietki. Francyja była ŭ haniebnym śpisie z-za novych praviłaŭ, jakija abmiažoŭvajuć svabodny patok infarmacyi i sudy nad žurnalistami.

Apošni hod pakazaŭ, nakolki važnym instrumientam pratestu i pieraŭtvareńniaŭ źjaŭlajecca internet. Siłu internetu zaśviedčyli revalucyi ŭ arabskim śviecie i skandały vakoł razhałošvańnia dypłamatyčnaj pierapiski ZŠA na sajcie Wikileaks.

«Internet źjaŭlajecca instrumientam, jaki moža być vykarystany i dla dobrych, i dla drennych metaŭ. Jon stvaraje prastoru svabody ŭ samych zakrytych krainach. Jaho patencyjał złuje dyktataraŭ, i pakazvaje, nakolki nieefiektyŭnaja aficyjnaja cenzura», — havorycca ŭ dakładzie.

Ź inšaha boku ŭrady časta vykarystoŭvać internet dla ŭłasnaj prapahandy i kantrolu. Takija krainy, jak Kitaj, Saudaŭskaja Aravija i Iran praciahvajuć filtravać internet-kantent. Aproč ich, siarod krain, varožych da internetu byli paznačanyja Birma, Kuba, Paŭnočnaja Kareja, Siryja, Turkmienistan, Uźbiekistan i Vjetnam.

U śpis krain, jakija znachodziacca «pad nahladam», miž inšaha, trapili Biełaruś, Rasija i Francyja.

• 0
• 0
• 0
• 0
• 0
• 0
• 0
• 0