Us iznoŭ źviarnuŭsia da hramadzianaŭ z nahody papravak u Vybarčy kodeks
Były kandydat u prezidenty Dźmitryj Us znoŭ źviarnuŭsia da hramadzian z prośbaj uziać udzieł u pracy inicyjatyŭnaj hrupy pa zbory podpisaŭ za źmianieńnie Vybarčaha kodeksa.
Jak zaznačajecca ŭ zajavie, deputaty ŭsich uzroŭniaŭ, pačynajučy ad sielsavietaŭ i zakančvajučy Pałataj pradstaŭnikoŭ, pazbaŭleny realnaj ułady. «Jany — nie deputaty. Ich nie vybiraŭ narod, ich pryznačyli čynoŭniki. Tamu ludzi z deputackimi značkami biazdumna ŭchvalajuć samyja niedarečnyja inicyjatyvy ŭłady. Heta tyčycca vašaha nievialikaha horada, vioski, stalicy. Vašy hrošy puskajuć na nabyćcio darahich inšamak i budaŭnictva ladovych pałacaŭ, u toj čas jak u balnicach pieraboi ź lekami, u dziciačych damach i škołach nie chapaje praścinaŭ i łyžak. Źmianić heta ŭ vašych siłach!», — zajaŭlaje Us.
Havorka idzie ab źmianieńni artykułaŭ 34, 35 i 72 Vybarčaha kodeksa. Jak miarkuje Us, nieabchodna, kab kandydaty mieli prava nakiroŭvać va ŭčastkovyja kamisii svaich pradstaŭnikoŭ, śpis jakich pavinien być padadzieny za 15 dzion da hałasavańnia. Pradstaŭnikam kandydata pavinny vydavać paśviedčańni členaŭ vybarkamaŭ na praciahu troch dzion.
Aprača taho, členam kamisii, jakija pradstaŭlajuć kandydataŭ, pavinna być dadziena prava stavić svoj podpis na advarotnym baku kožnaha biuletenia. Heta, na dumku Usa, dazvolić paźbiehnuć niezakonnaha ŭkidvańnia biuleteniaŭ u skryni padčas daterminovaha hałasavańnia i falsifikacyj padčas padliku hałasoŭ.
Jak paviedamiŭ Us, na hety čas u inicyjatyŭnuju hrupu pa źmianieńni vybarčaha zakanadaŭstva ŭvachodziać kala tysiačy čałaviek.
«Niekatoryja prychodziać, niekatoryja sychodziać. Sychod ludziej źviazany z naciskam na ich paśla taho, jak administracyja pradpryjemstvaŭ abo miascovyja ŭłady daviedvajucca, što jany padtrymali maju inicyjatyvu. Mała kamu chočacca stracić pracu»,— zaznačyŭ Us.
Data praviadzieńnia schodu inicyjatyŭnaj hrupy, jakaja budzie zajmacca zboram podpisaŭ u padtrymku źmianieńniaŭ u zakanadaŭstva, pakul nie vyznačana. «Zaraz my pravodzim infarmacyjnuju kampaniju, spadziajomsia, što hrupa dasiahnie dźviuch tysiač čałaviek. I ŭžo bližej da kanca studzienia budziem vyrašać, dzie i kali adbudziecca schod», — skazaŭ Us.
Jon taksama paviedamiŭ, što ŭvažliva aznajomiŭsia z rastłumačeńniami Centrvybarkama adnosna realizacyi hramadzianami zakanadaŭčaj inicyjatyvy. «U suviazi z hetymi rastłumačeńniami my i budziem pravodzić schod. My źbirajemsia dziejničać vyklučna pa zakonu», — zajaviŭ Us.
Varta zaznačyć, što źmianieńnie vybarčaha zakanadaŭstva Biełarusi było asnoŭnym tezisam pieradvybarnaj prahramy Usa padčas prezidenckich vybaraŭ 2010 hoda.
Kamientary