Homielskija ŭłady vydzielili učastak pryvatnaj zabudovy pad budaŭnictva carkvy. Ad pravasłaŭnych patrabujuć śpiarša źnieści chaty dy nabyć kvatery haspadaram. Pryčym, u ścisłyja terminy.
U Homieli pravasłaŭnyja vierniki źbirajuć podpisy pad zvarotam da miascovych uładaŭ, kaby tyja nie razburali Śviata‑Trajeckuju carkvu.
Kanflikt pačaŭsia jašče na pačatku hodu, ale tolki ciapier staŭ viadomy šyrokaj hramadzkaści.
U 2003 hodzie harvykankam vydaŭ dazvoł na raspracoŭku prajektna‑kaštarysnaj dakumentacyi dla budaŭnictva carkvy, pad jakuju adviali paŭtara hektary.
Vierniki planujuć zbudavać vialiki kamienny chram, ale z‑za adsutnaści srodkaŭ pakul uźviali časovuju draŭlanuju carkvu. Ciapier jany mohuć pačać i hruntoŭnaje budaŭnictva, ale tam, dzie musić paŭstać kamiennaja carkva, stajać try pryvatnyja chaty. Ułady chočuć, kab pravasłaŭnyja svaim koštam złamali hetyja chaty dy nabyli kvatery dla haspadaroŭ, ale nastajaciel chramu ajciec Piotar śćviardžaje, što takich srodkaŭ carkvie nie znajści.
U studzieni harvykankam nakiravaŭ list archijapiskapu Arystarchu, dzie nahadvajecca, što terminy dla padačy prajektu skančajucca. Kali dakumentacyja nia budzie padadzienaja, to «vykankamam budzie razhledžana pytańnie pra znos svavolna pastaŭlenych budynkaŭ dy vyzvaleńnie ŭčastku».
Prajekt užo jość, ale ž sprava ŭpirajecca ŭ zhadanyja chaty. Kali zvarot da miascovych čynoŭnikaŭ nia daść stanoŭčych dla chramu vynikaŭ, to vierniki pakidajuć za saboj prava źviarnucca da prezydenta.
Kamientary