naviny haspadarskija
837 tys. biełarusaŭ aficyjna nidzie nie pracujuć i nia vučacca. A ŭ žniŭni zvolniać jašče 11,4 tys. čałaviek — u paŭtara razu bolej, čym u lipieni. U vyniku skaračeńnia štataŭ pracaŭnikoŭ “šeraha” sektaru ekanomiki jašče paboleje.
vypłaty Čarnobylcam admienienyja z-za ich mizernych pamieraŭ. Zhodna z rašeńniem A.Łukašenki, jany nie indeksavalisia.
HOT-DOHI naleta pierastanuć pradavać u šapikach. Zamiest ich Mienharvykankam choča stvaryć 80 kaviarniaŭ chutkaha charčavańnia na pieršych pavierchach budynkaŭ i kala ŭvachodaŭ u metro.
CENY PADVYSILISIA na 20,2% z pačatku hodu. A ŭrad spadziavaŭsia, što zdoleje sioleta ŭtrymać inflacyju ŭ miežach 20—27% ceły hod...
280 TRAKTARYSTAŬ z pramysłovych pradpryjemstvaŭ buduć pracavać u časie žniva na Viciebščynie. Admovilisia ad “haradžanaŭ” pakul tolki try rajony — Pastaŭski, Šarkaŭščynski i Lepielski. A na Mienščynie najlepšyja traktarysty atrymajuć pa miljonu rubloŭ premii, pry ŭmovie, što staž pracy ŭ kałhasie nia mienšy za 15 hadoŭ.
METRO VA ŬRUČČA pačnuć kapać sioleta. Kali buduć hrošy, stancyi “Barysaŭski trakt” nasuprać korpusu BDTU i “Ŭručča” miž Šafarnianskaj i Łožynskaj vulicami adčyniacca ŭ 2007 h.
NA 300 TYS. TONAŬ RYBY atrymała kvotu Biełaruś u terytaryjalnych vodach Rasiei. Kab łavić jaje, rasiejcy prapanujuć biełarusam stvaryć sumiesnaje pradpryjemstva.
BIUDŽET NIE DABRAŬ za pieršuju pałovu hodu 1,7% zaplanavanych hrošaj. Najpierš pa padatkach zavinavacilisia stratnyja pradpryjemstvy.
S.I.
Plan Maršała dla Biełarusi
Abjadnanaja hramadzianskaja partyja prapanavała zładzić kanferencyju, pryśviečanuju prablemam demakratyzacyi Biełarusi, z udziełam mižnarodnych arhanizacyjaŭ, biełaruskich uładaŭ i apazycyi. Inicyjatar kanferencyi Anatol Labiedźka nazyvaje jaje “analaham planu Maršała dla Biełarusi”, jaki možna realizavać zhodna z formułaj “Demakratyja i zakonnaść u krainie ŭ abmien na mižnarodnaje pryznańnie dy zamiežnyja investycyi”.
Musiać być zadziejničanyja ŭsie subjekty, jakija vyjaŭlajuć cikavaść da sytuacyi ŭ Biełarusi, — Eŭraźviaz, Eŭraparlament, Rada Eŭropy, ABSE, parasonavyja partyjnyja arhanizacyi nakštałt Internacyjanału, biełaruskaja apazycyja, ułady, mahčyma, ź niejkim asobnym statusam, Rasieja. U asnovu rašeńniaŭ takoj kanferencyi pavinny być pakładzieny ŭzajemnyja abaviazki ŭładaŭ, apazycyi, mižnarodnaj supolnaści. Heta kanstruktyŭny padychod, jaki adpaviadaje intaresam nia stolki ŭłady ci apazycyi, kolki intaresam hramadzianaŭ Biełarusi, dumaje Labiedźka.
Prapanovy nakont udziełu ŭ kanferencyi ŭžo nakiravany ŭ šerah biełaruskich arhanizacyj, eŭrapiejskija struktury.
Daviedka “NN”. Plan Maršała –nazva prahramy adnaŭleńnia i raźvićcia Eŭropy paśla druhoj suśvietnaj vajny šlacham pradastaŭleńnia joj amerykanskaj ekanamičnaj dapamohi. Byŭ vyłučany ŭ 1947 h. Džordžam Ketletam Maršałam (ustupiŭ u dziejańnie ŭ krasaviku 1948-ha). U ažyćciaŭleńni planu brali ŭdzieł 17 eŭrapiejskich krain. Plan Maršała spryjaŭ umacavańniu stanovišča ZŠA ŭ Zachodniaj Eŭropie. U 1951 h. byŭ zamienieny zakonam “Ab uzajemnym zabieśpiačeńni biaśpieki”, jaki praduhledžvaŭ adnačasovaje pradastaŭleńnie ekanamičnaj i vajennaj dapamohi.
Vertykal raźličvajecca “Mersedesami”
19 rajvykankamaŭ Viciebskaje vobłaści vinny za paliva Respublikanskamu ŭnitarnamu pradpryjemstvu “Naftan”. Zhodna z rašeńniem abłasnoha haspadarčaha sudu, ichnaja majomaść nieŭzabavie moža być apisanaja, a bankaŭskija rachunki zablakavanyja.
Pieršym takaja dola pahražaje vykankamam Tałačynskaha dy Viciebskaha rajonaŭ, jakija vystupili harantami pierad “Naftanam” padčas zaklučeńnia damovaŭ na pastaŭku paliva dla praviadzieńnia pasiaŭnoj.
Tałačynskamu rajvykankamu pradjaŭleny sudovy pazoŭ na 500 młn. rubloŭ, i, kali Vyšejšy Haspadarčy sud nie dazvolić vypłačvać pazyki ŭ rasterminoŭku — majomaść rajvykankamu nieŭzabavie budzie apisanaja.
Rajvykankamu Viciebskaha rajonu taksama pradjaŭleny pazoŭ na 500 młn. rubloŭ, jakija, pavodle słovaŭ staršyni vykankamu Alaksandra Vaźmiciela, musili być vypłačanyja “Naftanu” jašče da 1 lipienia. Ale hrošaj na pahašeńnie pazyki ŭ rajonie niama.
U takoj sytuacyi apynulisia jašče 17 z 21 rajvykankamaŭ Viciebščyny. Mnohija zapazyčanaści ŭtvarylisia jašče ŭ 2000 h., a za 2001 h. istotna padraśli.
Šukajučy vyjścia, staršyni ryjvykankamaŭ prapanujuć naftapierapracoŭščykam apłatu ŭłasnaj sielhaspradukcyjaj. Ale aceńvajuć jaje zanadta doraha, kab ździełka mahła padacca vyhadnaj.
I ŭsie amal u adzin hołas śćviardžajuć, što stalisia achviarami niezakonnych zahadaŭ, jakija jany atrymali 2 hady tamu z Savietu ministraŭ pa telefonie. Tady, nasupierak Zakonu ab biudžecie, rajvykankamy prymusili ŭziać na siabie harantyi płaciažoŭ pry zaklučeńni finansavych pahadnieńniaŭ. Ale za dva hady pamianiałasia stolki ministraŭ, što kancoŭ užo nia znojdzieš. Adno spadziavańnie — što Vyšejšy haspadarčy sud daść jašče adnu adterminoŭku.
A.K.
Ź miasa — na buraki
Pakul bolšaść z nas maryć pra chaładok i adpačynak, na abšarach ščyrujuć 4763 kambajny: idzie žnivo. Najbolš tych kambajnaŭ na Mienščynie — 1303, a najmienš na Mahiloŭščynie — 303. Abnasiłasia radzima PPRB! Uradžajnaść sioleta pa vynikach na aŭtorak — 26,12 centnera z hiektaru (letaś jana była trochi bolšaj — 27,04 c/ha).
U paraŭnańni z 1990 h., biełarusy zrabilisia ŭ značna bolšaj stupieni vehetaryjancami. Tak, u pieršy hod niezaležnaści ŭ raźliku na adnaho biełarusa ŭ krainie vyrablałasia 116 kh miasa ŭ hod, a ŭ 2000—2001 — tolki kala 60 kh. 12 hadoŭ tamu ad karovaŭ u raźliku na “dušu nasielnictva” nadojvali 732 litry małaka štohod, a apošnim časam — 449 ł. Zbožža dy bulby taksama vyrastaje mieniej, chiba što spad tut nie taki vialiki. Adzinaje, čaho paboleła ci nie ŭdvaja, — heta harodniny. U 1990 h. na kožnaha žychara vyroščvałasia tolki 73 kh harodniny štohod, a letaś — až 142 kh.
Kamientary