Андрэй Кім, Сяргей Парсюкевіч і Аляксандр Казулін распаўсюдзілі заяву.
Андрэй Кім, Сяргей Парсюкевіч і Аляксандр Казулін патрабуюць неадкладнага вызвалення ваўкавыскіх прадпрымальнікаў Мікалая Аўтуховіча, Юрыя Лявонава і Уладзіміра Асіпенкі.Пра гэта гаворыцца ў заяве, распаўсюджанай імі 10 лютага.
8 лютага 2009 года байцы спецпадраздзялення МУС «Алмаз» затрымалі былых палітзняволеных М.Аўтуховіча і Ю.Лявонава, вызваленых летам гэтага года пад ціскам міжнароднай грамадскасці, гаворыцца ў заяве. Трэцяй ахвярай міліцэйскага самавольства стаў У.Асіпенка — супрацоўнік фірмы, дзе працаваў М.Аўтуховіч.
«Выстаўленыя Лявонаву, Аўтуховічу і Асіпенку абвінавачанні абсурдныя і не вытрымліваюць ніякай крытыкі. Гэта прызнаў нават былы супрацоўнік міліцыі, падпал дома якога следства спрабуе паставіць ім у віну. Відаць, што адказнасць за выбух у сталіцы ўлада поўнасцю вырашыла ўскласці на апазіцыю. Гэты арышт — плявок у твар афіцыйнай Еўропе і добрая дэманстрацыя гэтак званай «лібералізацыі», — лічаць былыя палітзняволеныя.
Яны зазначаюць, што пад крымінальным пераследам па‑ранейшаму знаходзяцца 14 маладых людзей, удзельнікаў мітынгу прадпрымальнікаў мінулай зімой; былыя палітзняволеныя па‑ранейшаму абмежаваныя ў сваіх грамадзянскіх правах, ніхто з іх не рэабілітаваны; пад пагрозай жыццё амерыканскага грамадзяніна Эмануіла Зельцэра, які знаходзіцца ў бальніцы ў беларускай турме, а яго адвакаты ўжо паўгода не могуць атрымаць прысуд на рукі, каб яго абскардзіць; актывістаў апазіцыі прымусова прызываюць у армію.
«Супрацоўніцтва з гэтым рэжымам не толькі амаральнае, але і небяспечнае. Еўрапейскі бізнес і афіцыйны Брусель павінны памятаць, што гульня з чалавекам без прынцыпаў заўсёды ідзе згодна з яго правіламі. І наступнай ахвярай можа апынуцца кожны, незалежна ад колеру яго пашпарта», — зазначаюць былыя палітзняволеныя.
У сувязі з гэтым яны патрабуюць неадкладнага вызвалення М.Аўтуховіча, Ю.Лявонава і У.Асіпенкі, перадачы Э.Зельцэра ў рукі амерыканскага правасуддзя, спынення «насільнай дактыласкапіі рэспубліканскага маштабу» і «агляду гвалтоўна прызваных ва Узброеныя сілы Беларусі грамадскіх актывістаў міжнароднымі экспертамі»,аднаўлення ўсіх палітзняволеных у іх грамадзянскіх і маёмасных правах і адмены рэпрэсіўных прысудаў па «справе чатырнаццаці».
«Мы спадзяемся на салідарную рэакцыю амерыканскай і еўрапейскай дыпламатыі ў сувязі з грубымі парушэннямі беларускім бокам узаемных дамоўленасцей», — зазначаюць А.Казулін, А.Кім і С.Парсюкевіч.
Цяпер чытаюць
Стаў вядомы прысуд экс-памочніку Лукашэнкі Ігару Брыло4
Каментары