Кіраўнік Еўрарады: Еўрасаюз гатовы абараняць тэрытарыяльную цэласнасць Даніі
Еўрапейскі Саюз цалкам падтрымлівае Данію ў сувязі з пагрозамі Дональда Трампа аб далучэнні да ЗША Грэнландыі і гатовы абараняць прынцыпы нацыянальнага суверэнітэту і тэрытарыяльнай цэласнасці. Пра гэта ў інтэрв'ю тэлеканалу Euronews заявіў кіраўнік Еўрарады Антоніу Кошта.
У сваіх развагах еўрачыноўнік звярнуў увагу на пазіцыю, якую ЕС заняў з пачаткам поўнамаштабнага ўварвання ва Украіну.
«Менавіта гэтыя фундаментальныя прынцыпы прымушаюць нас падтрымліваць Украіну. Менавіта яны прымушаюць нас асуджаць парушэнні межаў Дэмакратычнай Рэспублікі Конга. Мы не павінны спыняць абараняць гэтыя прынцыпы, калі на карту пастаўленая тэрытарыяльная цэласнасць дзяржавы — члена Еўрапейскага Саюза», — заявіў Антоніу Кошта.
«Тэрытарыяльная цэласнасць Даніі, суверэнітэт Даніі, стабільнасць яе межаў, — для нас, безумоўна, пытанне першашараговай важнасці», — рэзюмаваў старшыня Еўрапейскай рады.
З таго часу, як Дональд Трамп адмовіўся выключыць магчымасць выкарыстання эканамічнага прымусу і вайсковай сілы для захопу Грэнландыі, Еўрасаюз знаходзіцца ў напружанні, спрабуючы зразумець, наколькі рэальная гэтая пагроза.
Днямі прэзідэнт ЗША падліў яшчэ алею ў агонь: «Я думаю, мы даможамся гэтага, — сказаў ён журналістам. — Я сапраўды не ведаю, якія прэтэнзіі мае Данія, але было б вельмі недружалюбным актам, калі б яны не дазволілі гэтаму здарыцца, таму што гэта робіцца для абароны вольнага свету».
Пасля таго прэм'ер-міністарка Даніі Метэ Фрэдэрыксен адразу адправілася ў міні-турнэ па Еўропе. Яе мэта: атрымаць падтрымку краін ЕС перад беспрэцэдэнтным выклікам. Фрэдэрыксен заявіла, што яна адкрытая для ўмацавання вайсковага супрацоўніцтва са Злучанымі Штатамі, але настойвае на тым, што паўаўтаномны востраў, які ўваходзіць у склад Дацкага каралеўства, не прадаецца.
Новае апытанне засведчыла, што 85% дарослых жыхароў Грэнландыі выступаюць супраць планаў Трампа. Хоць Грэнландыя не з'яўляецца членам ЕС, яна мае доступ да яго фондаў, грэнландцы карыстаюцца свабодай перамяшчэння ўнутры супольнасці і лічацца грамадзянамі Еўрасаюза.
Еўракамісія пацвердзіла, што ў выпадку вайсковай агрэсіі на Грэнландыю будзе распаўсюджвацца палажэнне аб узаемнай абароне, прадугледжанае дамовамі.
«Грэнландыя з'яўляецца часткай тэрыторыі Каралеўства Данія. Данія — суверэнная дзяржава. Данія вызначае свае інтарэсы, і Еўрапейскі саюз будзе падтрымліваць яе», — сказаў Антоніу Кошта, неаднаразова падкрэсліўшы неабходнасць выканання міжнароднага права.
«Мы не збіраемся будаваць здагадкі. Мы, натуральна, спадзяемся, што гэтая спрэчка не перарасце ў канфлікт, а калі канфлікт і ўзнікне, то яна будзе развязаная палюбоўна, як і належыць саюзнікам», — падкрэсліў ён.
Данія можа адказаць амерыканцам за Грэнландыю асіметрычным ударам. І гэта будзе адчувальна для эліт
У Еўрасаюзе прапанавалі размясціць у Грэнландыі еўрапейскія войскі
Трамп «рэзка пагаварыў» з прэм'ерам Даніі
Большасць жыхароў Грэнландыі гатовы далучыцца да ЗША — апытанне
Прэм'ер Грэнландыі: Мы не хочам быць амерыканскімі або дацкімі, але хочам быць незалежнымі
За прэтэнзіямі Трампа на Панаму, Канаду і Грэнландыю можа хавацца тонкі перамоўны разлік
Чаму Трамп загаварыў пра Грэнландыю?
Цяпер чытаюць
Стаў вядомы прысуд экс-памочніку Лукашэнкі Ігару Брыло4
Каментары