ЗША і Расія дамовіліся аб аднаўленні ранейшай колькасці штату пасольстваў
Злучаныя Штаты Амерыкі і Расія дамовіліся аб аднаўленні колькасці супрацоўнікаў дыпламатычных місій у Маскве і Вашынгтоне. Як паведамляе Associated Press, пра гэта заявіў дзяржаўны сакратар ЗША Марка Рубіа пасля перамоў з расійскай дэлегацыяй, якія прайшлі ў Саудаўскай Аравіі.
Па словах Рубіа, паўнавартасная праца дыпламатычных місій неабходная для падтрымання каналаў сувязі паміж краінамі.
«Нам спатрэбяцца актыўныя амбасады, якія змогуць эфектыўна функцыянаваць, каб мы маглі працягваць дыпламатычную працу», — сказаў ён.
Ён дадаў, што прэзідэнт ЗША Дональд Трамп імкнецца забяспечыць справядлівае завяршэнне канфлікту, каб пазбегнуць яго аднаўлення праз некалькі гадоў. Аднак, падкрэсліў Рубіа, заканчэнне вайны магчыма толькі пры згодзе ўсіх бакоў, а ўмовы павінны быць «прымальнымі» для ўсіх удзельнікаў.
Раней Расія і ЗША неаднаразова абменьваліся высылкамі дыпламатаў. З 2000 года Злучаныя Штаты выслалі ў агульным ліку 225 расійскіх супрацоўнікаў дыпламатычных місій, што робіць іх лідарамі сярод заходніх краін па гэтым паказчыку. У верасні 2023 года МЗС Расіі абвясціла персонамі нон грата двух амерыканскіх дыпламатаў — першага і другога сакратароў амбасады ЗША, Джэфры Сіліна і Дэвіда Бернстайна. Расійскі бок абвінаваціў іх у «супрацьпраўнай дзейнасці і ўмяшанні ва ўнутраныя справы Расіі».
Цяпер чытаюць
Стаў вядомы прысуд экс-памочніку Лукашэнкі Ігару Брыло4
Каментары