«Хочам проста сказаць дзякуй». У Гомелі шукаюць хлопца з тралейбуса
Бацькі гомельскай школьніцы звярнуліся ў рэдакцыю «Моцных Навін». Яны шукаюць маладога чалавека, які не застаўся ў баку ад сітуацыі, якая магла скончыцца кепска.
31 сакавіка, у прамежку з 13:30 да 14:00, 11‑гадовая дзяўчынка вярталася са школы дадому. Яна ехала ў тралейбусе па маршруце «Універмаг Гомель — стадыён Лакаматыў».
Падчас паездкі да яе пачаў назойліва чапляцца нецвярозы пасажыр: рабіў дзіўныя кампліменты, частаваў адкрытым батончыкам, запэўніваў, што ведае яе бацькоў, і казаў пра будучае замужжа.
Нягледзячы на тое, што бацькі вучылі дачку правілам бяспекі, ад спалоху дзяўчынка ўпала ў ступар — у дзіцяці пачалася сапраўдная істэрыка.
У гэты момант за школьніцу заступіўся малады чалавек. Ён не толькі асадзіў навязлівага незнаёмца, але і выйшаў разам з дзяўчынкай на яе прыпынку. Хлопец правёў яе да сярэдзіны вуліцы, па дарозе выкінуў падазроны пачастунак і патлумачыў, чаму нельга нічога браць у чужых людзей.
«Я баюся ўявіць, чым магла б скончыцца гэтая сітуацыя. Хацелася б проста па-бацькоўску сказаць хлопцу дзякуй за тое, што заступіўся за гонар і годнасць нашага дзіцяці. Дапамажыце яго знайсці!» — напісала маці дзяўчынкі ў рэдакцыю «Моцных навін».
Каментары