У Варшаве замежнікаў правяралі «патрульныя» ў форме, якія не маюць дачынення да дзяржаўных органаў
Справай ужо занялася варшаўская паліцыя.
На Цэнтральным вакзале Варшавы заўважылі патрульных у форме, якая нагадвае вайсковую, якія спынялі замежнікаў і спрабавалі высветліць, хто яны. Аднак яны не маюць дачынення ні да сілавых структур, ні да іншых дзяржаўных органаў, піша Most.
Выпадак атрымаў шырокі рэзананс пасля таго, як у інтэрнэце разышлося відэа, дзе патруль падыходзіць да смуглявых людзей. Цяпер справай займаецца паліцыя.
Судзячы па нашыўцы BPG на рукаве, патрульныя прадстаўляюць правую групу «Абаронім польскую мяжу» (Bronimy Polskiej Granicy). На яе сайце мэты апісваюцца, у тым ліку, як супрацьдзеянне таму, «каб нашы каштоўнасці і наша вера разбурыліся і былі зняважаныя».
Выгляд удзельнікаў групы нагадвае тое, як маглі б выглядаць прадстаўнікі якой-небудзь сілавой структуры: форма, па колеры падобная да вайсковай, нашыўкі на рукавах з абрэвіятурай ініцыятывы, польскім сцягам і арлом.
Але ніякай дзяржаўнай структуры яны не прадстаўляюць. А нашыўку з абрэвіятурай групы на яе сайце можна было свабодна набыць за 32 злотыя — цяпер там пазначана, што тавар распрададзены.
«Няма і не будзе ніякай згоды на тое, каб якія-небудзь асобы выдавалі сябе за супрацоўнікаў праваахоўных органаў, правяралі дакументы грамадзян або імітавалі прадстаўнікоў сілавых структур. Такія паводзіны недапушчальныя ў прававой дзяржаве», — напісала ў сацсетцы X Караліна Галецкая, прэс-сакратар, дырэктар дэпартамента камунікацыі МУС.
Яна дадала, што паводле арт. 227 Крымінальнага кодэкса выдаванне сябе за службовую асобу з’яўляецца злачынствам.
«Падобныя дзеянні прыводзяць да эскалацыі страху і сацыяльнай напружанасці, а таксама сур’ёзна падрываюць давер грамадзян да паліцыі і іншых сілавых структур», — патлумачыла яна.
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі10
Каментары