Кіраўніцтва Аб’яднанай грамадзянскай партыяй узяў на сябе ганаровы старшыня АГП Станіслаў Багданкевіч. Аб гэтым гаворыцца ў заяве палітыка, апублікаванай на сайце АГП.
«Мірная дэманстрацыя беларускіх грамадзян пад кіраўніцтвам дзевяці апазіцыйных кандыдатаў у прэзідэнты супраць фальсіфікацыі выбараў была жорстка разагнаная з наступным арыштам як кандыдатаў у прэзідэнты, так і іх прыхільнікаў, — гаворыцца ў заяве. — Сярод арыштаваных — старшыня Аб’яднанай грамадзянскай партыі Анатоль Лябедзька, а таксама шэраг іншых членаў вышэйшага кіраўніцтва партыі і актывістаў, у тым ліку старшыня Мінскай гарадской арганізацыі АГП Анатоль Паўлаў і яго намеснік Алег Корбан».
«Ва ўмовах, калі партыя фактычна абезгалоўленая, зыходзячы з адказнасці за партыю, за захаванне яе адзінства і неабходнасці неадкладнай арганізацыі барацьбы за вызваленне нашых рэпрэсаваных таварышаў, часова, па ўзгадненні з Палітсаветам АГП, прымаю на сябе кіраўніцтва Аб’яднанай грамадзянскай партыяй», — заяўляе Станіслаў Багданкевіч.
Нагадаем, Анатоль Лябедзька, давераная асоба кандыдата ў прэзідэнты Яраслава Раманчука, быў затрыманы ў ноч з 19 на 20 снежня ў Мінску. Ён знаходзіцца ў СІЗА КДБ.
Палітыку прад’яўлены абвінавачанні па частках 1 і 2 артыкула 293 КК (масавыя беспарадкі). Справа распачата следчым упраўленнем папярэдняга расследавання ГУУС Мінгарвыканкама.
Згодна з часткай 1 гэтага артыкула, «арганізацыя масавых беспарадкаў, якія суправаджаліся насіллем над асобай, пагромамі, падпаламі, знішчэннем маёмасці, узброеным супраціўленнем прадстаўнікам улады», караецца пазбаўленнем волі на тэрмін ад 5 да 15 гадоў.
Згодна з часткай 2, «удзел у масавых беспарадках, што выразілася ў непасрэдным учыненні дзеянняў, названых у частцы першай гэтага артыкула», караецца пазбаўленнем волі на тэрмін ад 3 да 8 гадоў.
Цяпер чытаюць
Хто забараняе ў Беларусі кнігі — вось гэтыя 22 чалавекі16
Хто забараняе ў Беларусі кнігі — вось гэтыя 22 чалавекі
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары