Znojdzieny žančyna i jaje dačka, jakija źnikli 14 hadoŭ tamu i ličylisia zabitymi

Śledčyja orhany adšukali žančynu i jaje dačku, jakija źnikli bieź viestak 14 hadoŭ tamu i 9 hadoŭ ličylisia zabitymi.

Jak paviedamiŭ aficyjny pradstaŭnik upraŭleńnia Śledčaha kamiteta pa Hrodzienskaj vobłaści Siarhiej Šaršanievič, u červieni 2006 hoda ŭ Kastryčnicki RAUS Hrodna pastupiła infarmacyja ab tym, što źnikła žycharka abłasnoha centra 1963 hoda naradžeńnia i jaje dačka 1992 hoda naradžeńnia. Orhany papiaredniaha rasśledavańnia raspačali pa fakcie źniknieńnia kryminalnuju spravu. 

U chodzie dalejšaha rasśledavańnia źjavilisia źviestki, što abiedźvie mahli stać achviarami złačynstva. Z ulikam hetaha prakuratura Hrodzienskaj vobłaści raspačała spravu pa fakcie naŭmysnaha zabojstva žančyny i jaje dački (p. 1, 2 č. 2 art. 139 KK) i spałučyła jaje ŭ adnoj vytvorčaści z kryminalnaj spravaj pa fakcie źniknieńnia. 

U chodzie śledčych dziejańniaŭ i apieratyŭna-vyšukovych mierapryjemstvaŭ miescaznachodžańnie źnikłych ustanoŭlena nie było, a ŭskosnyja źviestki, jakija pieršapačatkova śviedčyli ab zabojstvie, nie znajšli svajho paćviardžeńnia. Razam z tym, jak adznačajuć va USK, pryniatyja miery byli nie daremnymi. Na ich asnovie ŭ lutym 2015 hoda śledčyja Hrodzienskaha mižrajonnaha adździeła SK, jakija praciahvali pracavać pa kryminalnaj spravie, atrymali infarmacyju ab mahčymym miescaznachodžańni adšukvanych asob. Pryčym padstaŭ mierkavać, što ŭ dačynieńni da ich učynialisia supraćpraŭnyja dziejańni, nie było. 

Źviestki byli pravierany śledčymi i supracoŭnikami ŭpraŭleńnia kryminalnaha vyšuku UUS Hrodzienskaha abłvykankama. U vyniku jany znajšli paćviardžeńnie.

Vyśvietliłasia, što jašče ŭ 2001 hodzie žančyna razam z dačkoj dobraachvotna vyjechała na pastajannaje miesca žycharstva ŭ Rasiju, nie paviedamiŭšy ab hetym svajakam i znajomym i razarvaŭšy ź imi adnosiny nadalej. Dakumienty, jakija śviedčać asobu, maci i dačka ŭ RF nie pieraaformili, žyvučy biez rehistracyi. Achviarami zabojstva i inšych złačynstvaŭ abiedźvie nie źjaŭlajucca.

Śledčyja nakiravali ŭ Rasiju daručeńnie ab akazańni pravavoj dapamohi dla vyśviatleńnia ŭsich abstavinaŭ vyjezdu hramadzianak z krainy. Akramia taho, dla dadatkovaha śviedčańnia ich asob pryznačyli sudova-hienietyčnyja i partretna-identyfikacyjnyja ekśpiertyzy. Paśla vykanańnia hetych i inšych śledčych dziejańniaŭ budzie pryniata rašeńnie ab spynieńni papiaredniaha rasśledavańnia pa kryminalnaj spravie ŭ suviazi z adsutnaściu hramadska niebiaśpiečnaha dziejańnia, praduhledžanaha kryminalnym zakonam.

• 0
• 0
• 0
• 0
• 0
• 0
• 0
• 0