Deputat-biełarus raspavioŭ ab svajoj roli ŭ adpraŭcy dobraachvotnikaŭ u Danbas

Deputat Dziarždumy i staršynia praŭleńnia Rasijskaha Sajuza vieteranaŭ Afhanistana Franc Klincevič raskazaŭ telekanału «Dožd́» ab svajoj roli ŭ adpraŭcy dobraachvotnikaŭ z Rasii ŭ Danbas. Klincevič rodam z katalickaj biełaruskaj siamji, z paŭnočna-zachodniaha biełaruskaha horada Ašmiany. U saviecki čas jon vyvučyŭsia na palitrabotnika armii. Paśla razvału SSSR zastaŭsia ŭ Rasii i zrabiŭ karjeru ŭ «Adzinaj Rasii».

Pavodle słoŭ Klinceviča, jon całkam padzialaje i padtrymlivaje «dobraachvotny ŭdzieł u kanflikcie ŭ Danbasie».

«Kali pajšoŭ voś hety vał ludziej — byli b sotni tysiač ludziej, kali b ja hetymi pracesami zajmaŭsia b tak, štučna. Ja nie toje što sotni, ja tysiačy čałaviečych žyćciaŭ vyratavaŭ svaimi hramatnymi dziejańniami. Heta tyja, chto słužyŭ, viedajecie, ja ŭ hetym płanie», — paviedamiŭ Klincevič.

«Heta dobraachvotnaje rašeńnie ludziej, pačatak ludziej — heta ruch. Ja nie staviŭ ni pierad kim zabarony. Ale ja jašče hetuju štuku razumieŭ, bo mnie było lahčej, heta źviazana sa svajakami, mnie nichto nie moh vystavić pretenzij u płanie taho, što my tam praces arhanizoŭvali i hetak dalej, kab dapamahčy paranienym, jakija zahinuli. Usio roŭna ja razumieŭ, što hetym ludziam treba dapamahać», — apraŭdalna raskazvaŭ Klincevič.

Na pytańnie karespandenta ab kolkaści «dobraachvotnikaŭ» z boku Rasiei na terytoryi samaabvieščanych respublik Klincevič skazaŭ, što ich «šmat».

«Mnohija z hetych chłopcaŭ našych, jakija pryjšli, jany ž mieli bajavy dośvied, zvańni pałkoŭnikaŭ, padpałkoŭnikaŭ Savieckaj armii, dzie vučyli ŭ vučyliščach, u akademijach, dzie prafiesijanalizm zastaŭsia, razumiejecie? Heta ŭsio ničoha nie zabyvajecca, ruki pamiatajuć», — dadaŭ jon.

Pavodle źviestak, sabranych pravaabaroncami, nie mienš za 260 rasijskich vajskoŭcaŭ zahinuli ŭ Danbasie. Jašče kala 1500 byli paranienyja.

Źviestki pra ŭdzieł rasijskich žaŭnieraŭ u vajennych dziejańniaŭ na Danbasie ŭłady Rasii staranna chavajuć, bo raskryćcio ich mahło pryvieści da ŭviadzieńnia Zachadam dadatkovych sankcyj. Bolš za toje, Rasii pahražaje navat Mižnarodny trybunał pa fakcie źbićcia pasažyrskaha «Boinha», u vyniku čaho zahinuli kala 300 čałaviek.

Usiaho ŭ vyniku sproby Rasii zachapić uschod Ukrainy zahinuła nie mienš za 6000 čałaviek, u tym liku 1530 ukrainskich vajskoŭcaŭ. Kala 30 tysiač čałaviek było paraniena. Paŭtara miljona čałaviek vymušany byli pakinuć svaje damy.

10 miesiacaŭ doŭžylisia bajavyja dziejańni roznaj stupieni intensiŭnaści. U vyniku ich rasijskija siły ŭtrymali kantrol nad prykładna treciaj častkaj terytoryi Danieckaj i Łuhanskaj abłaściej, ale vymušanyja byli pakinuć stratehična važnyja Maryupal, Słaviansk i Kramatorsk.

• 0
• 0
• 0
• 0
• 0
• 0
• 0
• 0