Mikałaj Statkievič prakamientavaŭ BiełaPAN zaklik Alaksandra Łukašenki da apazicyi «žyć pa zakonie».
Kamientujučy 11 kastryčnika apazicyjnyja akcyi, jakija pravodzilisia ŭ Minsku apošni miesiac, Łukašenka paraiŭ apazicyi «žyć pa zakonie». «Vybary zakančvajucca ŭ 20.00, pačynajcie žyć pa zakonie», - zajaviŭ jon. Pavodle słoŭ Łukašenki, padčas vybarčaj kampanii apazicyja parušała biełaruskaje zakanadaŭstva, arhanizujučy niesankcyjanavanyja pikiety i šeści. Pry hetym jon dadaŭ, što viedaje ŭsich pradstaŭnikoŭ apazicyi. Pavodle słoŭ Łukašenki, ich «400 čałaviek ź dziesiaci miljonaŭ», a taksama raziavaki, jakija prychodziać pahladzieć na akcyi. «Raju vykonvać zakon. Nie tamu, što my baimsia za hetych 400 čałaviek. My turbujemsia za tych raziavak, jakija źbirajucca», - skazaŭ Łukašenka.
Statkievič, u svaju čarhu, zajaviŭ: «Łukašenka zaklikaje ŭsich žyć pa zakonie i sam pačnie žyć pa zakonie? Na im visić abvinavačvańnie pa asabliva ciažkich artykułach Kryminalnaha kodeksa pačynajučy z 1996 hoda».
«Kali jon sabraŭsia žyć pa zakonie, heta dobra, ale ci nie paznavata? Choć my darujem, kali jon viernie krainu ŭ zakonnaje rečyšča, — skazaŭ palityk. — Heta šou, jakoje jon zładziŭ, heta što — zakonna? Vykradańnie i zabojstva apanientaŭ — zakonna? Źmiena Kanstytucyi, rospusk parłamienta, padaŭžeńnie paŭnamoctvaŭ biez vybaraŭ na 2,5 hoda na padstavie kanstytucyjnaha refierendumu — heta zakonna? Pieralik možna biaskonca praciahvać».
U toj ža čas Statkievič spadziajecca, što, «moža, čałaviek zrazumieŭ, u jakoj jon situacyi, i, kab pamienšyć svaju vinu pierad biełaruskim narodam, pačnie žyć pa zakonie». «Spadziajusia, ale mała vieru», - adznačyŭ jon.
Statkievič dadaŭ, što ŭ kancy listapada płanujecca praviadzieńnie vuličnaj akcyi, prymierkavanaj da refierendumu 1996 hoda.
Ciapier čytajuć
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva1313
Kamientary