Mastak Alaksiej Maračkin źviarnuŭsia va UUS Centralnaha rajonu Minsku z zajavaj ab viartańni svaich aryštavanych tvoraŭ
1 krasavika mastak i hramadzki dziejač, staršynia mižnarodnaha hramadskaha abjadnańnia «Zhurtavańnie biełarusaŭ śvietu «Baćkaŭščyna» Alaksiej Maračkin nakiravaŭ va UUS Centralnaha rajonu Minsku zajavu ab viartańni svaich kanfiskavanych tvoraŭ vyjaŭlenčaha mastactva.
U interviju BiełaPAN jon paviedamiŭ, što havorka idzie ab viartańni jaho ŭłasnaści — karciny «Lalki», charuhvaŭ hramadzkaha abjadnańnia «Tavarystva biełaruskaj movy imia Franciška Skaryny», a taksama raściažak z roznymi tekstami. Siarod matyvaŭ svajho zvarotu ŭ milicyju mastak nazvaŭ toj fakt, što jon nie atrymaŭ kopiju pratakoła ź pieralikam usich rabot, kanfiskavanych padčas vobysku ŭ jaho majsterni.
«Ja piśmova vykłaŭ usie akaličnaści, źviazanyja z padziejami 24 sakavika, kali supracoŭniki siłavych struktur pozna viečaram niezakonna ŭvarvalisia ŭ maju majsterniu, praviali niesankcyjanavany vobysk i kanfiskacyju maich tvoraŭ, bolšaść ź jakich pryznačałasia dla afarmleńnia kalony ŭdzielnikaŭ šeścia ad budynku prezydyjumu NANB da płoščy Banhałor, zaplanavanaha na 25 sakavika. Ja nahadaŭ, što hetaje šeście, pryśviečanaje 90‑hoddździu abviašečńnia BNR, było dazvolena ŭładami. Aprača taho, ja zaznačyŭ, što karcina «Lalki», jakaja vystaŭlałasia raniej, u momant aryštu znachodziłasia ŭ majoj pryvatnaj kalekcyi tvoraŭ nankanfarmizmu, a nie na publičnym ahladzie», — skazaŭ A.Maračkin.
Pavodle jaho słoŭ, padčas aryštu tvoraŭ pradstaŭniki siłavych struktur zajavili, što na praciahu 10 dzion jany zrobiać zaklučeńnie pa źmieście kanfiskavanych žyvapisnych i hrafičnych rabot. Mastak vykazaŭ spadziavańnie, što pradstaŭniki pravaachoŭnych orhanaŭ viernuć tvory, jakija jamu naležać.
Nahadajem, pa abvinavačańni ŭ brydkasłoŭi i akazańni supraciŭleńnia pradstaŭnikam siłavych struktur na padstavie ich ža pakazańniaŭ A.Maračkin z 24 pa 29 sakavika byŭ uziaty pad administracyjny aryšt.
Ciapier čytajuć
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva1313
Kamientary