Tolki tatu nie kažy: u prakat vychodzić ščyry i dramatyčny biełaruski film pra realnyja prablemy padletkaŭ
Film Ułady Siańkovaj «II» — biesprecedentna ščyraje biełaruskaje kino — vychodzić u prakat. Vialikaja premjera z udziełam zdymačnaj hrupy adbudziecca ŭ «Maskvie» 11 śniežnia. Z 12 śniežnia film «II» možna budzie pahladzieć u piaci minskich kinateatrach, a taksama ŭ homielskim kinateatry «Mir». Bilety nieŭzabavie źjaviacca ŭ prodažy.
16-hadovyja Naścia, Saša i Kryścina vučacca razam u dziasiatym kłasie i žyvuć zvyčajnym žyćciom padletkaŭ: uroki, repietytary, pachody ŭ kino, viečarynki. U škole panuje surovaja dyscyplina i ciažka być nie takim, jak usie. Ale adnojčy hety maleńki śviet skałanie navina, paśla jakoj usie strachi i zababony vylezuć vonki.
Hałoŭnyja roli ŭ stužcy vykanali maładyja aktory Alina Juchnievič, Alaksiej Vajniłovič i Iłaryja Šaško.
Suśvietnaja premjera moładzievaj dramy prajšła na Varšaŭskim mižnarodnym kinafiestyvali, dzie karcinu ŭhanaravali Asablivaj zhadkaj žury za «kiniematahrafičny hołas z krainy, słaba pradstaŭlenaj na suśvietnaj scenie, jaki ŭzrušyŭ nas svaim śmiełym, advažnym i śviežym raskazvańniem historyi, jakaja źviartajecca da žorstkaj realnaści sacyjalnaj izalacyi». Biełaruskaja premjera adbyłasia ŭ ramkach 26-ha MMKF «Listapad» u pazakonkursnaj siekcyi «Śpiecyjalnyja pakazy» i stała adnoj z samych kranalnych i zapatrabavanych karcin fiestyvalu.
U minskim prakacie z 12 pa 18 śniežnia film pakažuć u VOKA Cinema by Silver Screen, Silver Screen Galileo, z 12 pa 25 śniežnia — u Falcon Club Bucik Kino, «Pijaniery» i «Rakiecie».
Karcina «II» stvoranaja Centram «ART Karparejšn» u supracoŭnictvie ź IITA JUNIESKA.
Kamientary