Aniščanka: U pieramovach pa małace my biarom tajm‑aŭt

Rasija biare tajm‑aŭt u pieramovach pa pastaŭkach biełaruskaj małočnaj pradukcyi na svoj rynak. Pra heta zajaviŭ ranicaj 16 červienia RIA Novosti kiraŭnik Rasspažyŭnahlada Hienadź Aniščanka.

«Publičnyja kamientaryi słužbovych asob Biełarusi, jakija my atrymali z presy hetaj krainy, a taksama kamientaryi aficyjnych ŚMI, naprykład «Sovietskoj Biełoruśsii», dali mnie ŭsie padstavy zasumniavacca ŭ tym, što damoŭlenaści z delehacyjaj ź Minska, jakaja znachodzicca ŭ Maskvie, supadajuć z pazicyjaj słužbovych asob Biełarusi, — cytuje RIA Novosti Aniščanka. — Kab nie hublać ich čas i naš, my dla ŭdakładnieńnia pazicyj biarom tajm‑aŭt i, u zaležnaści ad vynikaŭ ich (biełarusaŭ) tłumačeńniaŭ, vyrašym, budziem praciahvać hetuju pracu abo nie».

Nazvać mahčymyja terminy adnaŭleńnia pieramoŭ rasijski čynoŭnik nie zdoleŭ. «Kolki hety tajm‑aŭt praciahniecca — skazać nie mahu», — dadaŭ jon.

Jašče napiaredadni Aniščanka davoli pazityŭna kamientavaŭ chod biełaruska‑rasijskich pieramoŭ pa «małočnaj» prablemie.

«Siońnia prybyła ekśpiertnaja delehacyja ad usich zacikaŭlenych dziaržaŭnych orhanaŭ Biełarusi», — paviedamiŭ kiraŭnik Rasspažyŭnahlada 15 červienia na telekanale «Viesti» pavodle vynikaŭ pieramoŭ ź biełaruskaj delehacyjaj, jakaja znachodzicca ŭ Maskvie i jakuju ŭznačalvaje namieśnik ministra sielskaj haspadarki i charčavańnia Michaił Savieljeŭ.

«Razmova, uvohule, była pradmietnaj. Kali sustrakajucca śpiecyjalisty, jak praviła, nie byvaje nijakich emocyj. My abmiarkoŭvali, jak vykanać našy patrabavańni, jakija byli vystaŭleny. Napiaredadni jany vyznačylisia pa ŭzajemnym zadavalnieńni z tym abjomam pradukcyi, jaki jany buduć pastaŭlać nam na rynak, tamu što było 1 200. 600, jak jany śćviardžali, chacia i byli zarehistravany, ale ŭ asnoŭnym nie pastaŭlalisia. Im było skazana: vyznačcie, što vy budziecie pastaŭlać na rasijski rynak, kab u nas nie było błytaniny ŭ ličbach. Jany vydali nam tyja abjomy, jakija jany prapanoŭvajuć pastaŭlać. Jany zychodzili z tych papiarednich abjomaŭ, jakija jany pradavali ŭ minułyja hady», — paviedamiŭ telekanału Aniščanka.

Pry hetym jon dadaŭ: «Kali ŭsio budzie iści, jak idzie siońnia , to chacia i nie ŭ vielmi chutkaj, ale ŭsio‑taki ŭ ahladnaj budučyni biełaruskaja pradukcyja vierniecca na našy rynki».

Aniščanka paviedamiŭ, što 16 červienia płanavałasia «farmalizavać pratakoł». «Toje, pra što damovilisia, budzie pakładziena na papieru», — rastłumačyŭ kiraŭnik Rasspažyŭnahlada.

16 červienia «Sovietskaja Biełoruśsija», drukavany orhan Administracyi prezidenta, apublikavała vialiki artykuł pad nazvaj «Strašnaja pomsta», pryśviečany «małočnaj» prablemie. U im aprača ŭsiaho ŭtrymlivajecca krytyka na adras kankretnych rasijskich čynoŭnikaŭ.

«Možna paradavacca, što Uładzimir Uładzimiravič Pucin, jaki asabista vypuściŭ z butelki złoha džyna ŭ abliččy sanitara Aniščanki, publična i dachodliva nacisnuŭ na tarmazy. Tamu što ŭsia hetaja historyja stała pachodzić na drenny aniekdot», — zaznačaje «SB».

«Ich takich, śpiecyjalna navučanych, u Maskvie niekalki, — piša vydańnie, majučy na ŭvazie čynoŭnikaŭ. — I kali Haspadar choča pryhrazić hazavym vientylem, na scenie z pałajučym vačyma tut ža źjaŭlajecca Kupryjanaŭ. Kali treba prystrašyć niezhavorlivych susiedziaŭ małočna‑miasnoj prablemaj — vyklikajecca Aniščanka».

BiełaPAN

• 0
• 0
• 0
• 0
• 0
• 0
• 0
• 0