Biźnies-supolnaść patrabuje admieny pastanovy Saŭmina № 991

Biźnies-supolnaść budzie dabivacca admieny pastanovy Saŭmina № 991 ad 28 lipienia 2009 hoda «Ab niekatorych pytańniach nabyćcia tavaraŭ na terytoryi Respubliki Biełaruś», jakaja nabyła moc 2 žniŭnia. Takoje rašeńnie było pryniata 3 žniŭnia ŭ Minsku na ekstrannaj naradzie z udziełam pradstaŭnikoŭ ajčynnaha biźniesu.

U paniadziełak uviečary na imia premjer-ministra Biełarusi Siarhieja Sidorskaha Respublikanskaja kanfiederacyja pradprymalnictva i inšyja biźnies-abjadnańni płanujuć nakiravać sumiesny list z patrabavańniem admianić pastanovu.

Zhodna z acenkami pradstaŭnikoŭ biźniesu, jakija vystupali na pasiadžeńni, dakumient u ciapierašnim vyhladzie naniasie ŭron ekanomicy. Jon paciahnie bankructva bolšaści aptovych kampanij, pradstaŭnictvaŭ zamiežnych pradpryjemstvaŭ, pryviadzie da zychodu ź Biełarusi zamiežnych inviestaraŭ. Akramia taho, pastanova spravakuje rost karupcyi siarod dziaržorhanaŭ, jakim dadzieny paŭnamoctvy na vyznačeńnie aficyjnych handlovych pradstaŭnikoŭ.

«Taki dakumient nie maje prava na žyćcio. Treba nieadkładna prypynić jaho dziejańnie i raźbiracca, ź jakoj metaj jon uvodzicca i što treba, kab hetuju metu dasiahnuć»,

Pavodle jaho słoŭ, biźnies-supolnaść hatova dapamahčy ŭradu va ŭsich kanstruktyŭnych pačynańniach, u tym liku pa pytańni źnižeńnia admoŭnaha salda źniešniaha handlu, papaŭnieńnia biudžetu. «Adnak abmiarkoŭvać pytańni, jak razvalić ekanomiku, a mienavita heta prapanuje pastanova № 991, my nie budziem», — adznačyŭ Marhiełaŭ. Pry hetym kiraŭnik RKP ličyć nieabchodnym stavić taksama pytańnie «ab dziaržaŭnaj zdradzie z metaj razvału ekanomiki», i ŭsie prykmiety, na jaho dumku, dla hetaha jość.

Staršynia Biełaruskaha sajuza pradprymalnikaŭ Alaksandr Kalinin miarkuje, što nieabchodna zapatrabavać ad raspracoŭščykaŭ terminovaha kamientaru z rastłumačeńniem ich pazicyi. Jon vykazaŭ nadzieju, što dakumient źjaŭlajecca «techničnaj pamyłkaj». «Spadziajusia, tam majecca na ŭvazie nie toje, što tut napisana, tamu što zabaranić instytut pasrednictva niemahčyma. Heta zabje nie tolki aptavikoŭ, ale i ŭdaryć pa roźničnym handli», — adznačyŭ kiraŭnik BSP.

Kalinin taksama padkreśliŭ, što na apošnich naradach va ŭradzie z udziełam pieršaha vice-premjera Uładzimira Siamaški abmiarkoŭvalisia miery prama supraćlehłyja:

«My źviartali ŭvahu na toje, što instytut pasrednictva, jaki mnohija hady ŭ nas zhortvali, treba, naadvarot, adnaŭlać, što dazvoliła b stymulavać ekspart biełaruskaj pradukcyi».

Staršynia HA «Minski staličny sajuz pradprymalnikaŭ i rabotadaŭcaŭ» Uładzimir Karahin paviedamiŭ, što na praciahu paniadziełka va ŭradzie pry ŭdziele premjera Sidorskaha prachodzili narady pa pytańni prymianieńnia pastanovy № 991 i ŭ najbližejšy čas buduć padrychtavany jaje rastłumačeńni.

Spasyłajučysia na telefonnuju hutarku z namieśnikam ministra ekanomiki Andrejem Turam, Karahin adznačyŭ, što pastanova nie raspaŭsiudžvajecca na ekspart biełaruskich tavaraŭ, nie tyčycca indyvidualnych pradprymalnikaŭ i fizičnych asob (ramieśnikaŭ i tych, chto zajmajecca ahraturyzmam).

Jon taksama paviedamiŭ, što Ministerstva ekanomiki, jak vynikaje sa słoŭ Tura, nie źjaŭlajecca raspracoŭščykam pastanovy № 991, adnak budzie zajmacca rastłumačeńniem jaho dziejańnia.

Dakumient vyklučaje pasrednikaŭ z pracesu realizacyi jurydyčnym asobam ajčynnych i impartnych tavaraŭ na terytoryi Biełarusi. Jurasoby ciapier pavinny nabyvać tavary (za košt ułasnych, pazykovych srodkaŭ i srodkaŭ biudžetu) tolki ŭ tych pastaŭščykoŭ, jakija źjaŭlajucca vytvorcami, abo ich aficyjnych handlovych pradstaŭnikoŭ.

Pieraliki aficyjnych handlovych pradstaŭnikoŭ, u jakich jurasoby zmohuć zakuplać tavary, buduć zaćviardžacca respublikanskimi i miascovymi orhanami dziaržkiravańnia pa ŭzhadnieńni ź vice-premjerami, jakija kuryrujuć adpaviednyja śfiery ekanomiki. Dla ŭklučeńnia ŭ pieralik aficyjnych handlovych pradstaŭnikoŭ nieabchodna pradstavić ekanamičnaje abhruntavańnie nabyćcia tavaraŭ u pastaŭščyka.

• 0
• 0
• 0
• 0
• 0
• 0
• 0
• 0