Biełaruskaja čyhunka biare kredyty na vypłatu zarobkaŭ. Čamu tak i ci krytyčna heta?
U dakumiencie, jaki apublikavaŭ stačkam čyhunki, havorycca pra tranš ad Biełarusbanka ŭ žniŭni 2021 hoda. Jaho pamier — 646 tysiač rubloŭ — na zarobki i ŭnioski ŭ Fond sacyjalnaj abarony nasielnictva dla rabotnikaŭ upraŭleńnia čyhunki. Viarnuć jaho arhanizacyja była abaviazanaja ŭ vieraśni.
Takija dadatkovyja pahadnieńni da kredytnaj damovy zaklučajucca kožny miesiac.
«Nie tolki ŭpraŭleńnie, ale taksama abłasnyja adździaleńni biaruć kredyty. U adździaleńniaŭ bolšyja sumy, pakolki jany płaciać zarobki mnohim padraździaleńniam — łakamatyŭnym, vahonnym depo, stancyjam», — raskazvajuć «Našaj Nivie» ŭ stačkamie.
Takaja situacyja na čyhuncy ŭžo nie ŭpieršyniu. Pry hetym zatrymak z vypłatami zarobkaŭ nie było.
«U samim fakcie, što pradpryjemstva biare kredyt na vypłatu zarobkaŭ, čahości zahannaha, što adnaznačna śviedčyć ad niejkaj słaboj finansavaj pazicyi, niama. Tut šmat zaležyć ad kantekstu, i navat firma ŭ dobrym stanie patencyjna moža karystacca takim instrumientam. Pryčynaŭ moža być šmat. Samaja prostaja — heta karotkaterminovyja pieraboi ź likvidnaściu», — tłumačyć ekanamist Dźmitryj Kruk.
Što tyčycca niepasredna čyhunki, to ekśpiert miarkuje, pryčyna moža być u tym, što joj bolš vyhadna skarystacca kredytam — jon biespracentny, a svaje hrošy pakłaści na depazit.
«Ciapier staŭki na finansavym rynku vielmi skažonyja, i kali, źjaŭlajučysia bujnym dziaržaŭnym pradpryjemstvam, čyhunka zmahła zabiaśpiečyć sabie pryvabnyja ŭmovy i ŭ depazitnaj častcy, i ŭ kredytnaj, heta dla jaje prosta moža być dadatkovaj krynicaj čystaha prybytku. Ale padkreślu, heta maja zdahadka».
Biełaruskaja čyhunka — heta prybytkovaje pradpryjemstva. Vyklučeńniem staŭ 2020 hod, kali arhanizacyja spracavała sa stratami ŭ 387 miljonaŭ rubloŭ. Heta było źviazana sa źnižeńniem abjomaŭ vytvorčaści naftapierapracoŭčych zavodaŭ u suviazi z abmiežavańniem Rasii pastavak syraviny. Kavidny kryzis taksama źniziŭ ekanamičnuju aktyŭnaść u śviecie.
«Ale za 2021 hod, miarkujučy pa pakazčykach biahučaj statystyki, pa dynamicy hruza- i pasažyraabarotu, jak minimum hetyja straty pamienšali, a chutčej, ja dumaju, pradpryjemstva navat u nievialički plus vyjšła, blizki da ŭzroŭniu 2019 hoda», — ličyć Dźmitryj Kruk.
Pa stanie na 1 lipienia 2021 hoda ŭ arhanizacyi zapazyčanaściaŭ było ahułam na sumu 2,5 miljarda rubloŭ. Heta kredyty, vydadzienyja biełaruskimi bankami, Ekspartna-imparnym bankam Kitaja i rasijskim «Pramsuviaźbankam». Pradpryjemstva brało ich na elektryfikacyju asobnych učastkaŭ, pakupku novych kitajskich elektravozaŭ, «Štadleraŭ». Praterminovak z vypłatami pa ich u čyhunki nie było, jak paviedamlajecca ŭ finansavych spravazdačach pradpryjemstva.
Čytajcie taksama:
«Ci to sumku pastavili, ci to inšaje». Mašynistaŭ ciahnika adchilili ad pracy za sihnał kala Aleksandryi
«Pieraviaduć ludziej u ramont, a tam kapiejki płaciać». Čyhunačnik pra toje, što čakaje rabotnikaŭ z-za spynieńnia biełaruska-litoŭskaha tranzitu
«Śpiecyfičnyja bazy danych, nie chapaje śpiecyjalistaŭ adnavić». Što adbyvajecca na čyhuncy paśla ŭzłomu? Padrabiaznaści
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary