Ministerstva achovy zdaroŭja nie paćviardžaje i nie abviarhaje infarmacyju ab vyjaŭleńni śvinoha hrypu jašče ŭ traich hramadzian Biełarusi.
Ministerstva achovy zdaroŭja nie paćviardžaje i nie abviarhaje infarmacyju ab łabaratornym paćviardžeńni zaražeńnia virusam hrypu A/H1N1 (śviny hryp) traich minčan, jakija viarnulisia 22 žniŭnia z Kipra.
Adzin z zachvarełych paviedamiŭ haziecie «Komsomolskaja pravda» v Biełoruśsii», što ŭ jaho, jaho žonki i siabra zachvorvańnie na śviny hryp paćvierdzili ŭ minskaj balnicy, kudy jany samastojna nakiravalisia z‑za drennaha samaadčuvańnia prosta z aeraporta paśla prylotu z Kipra.
Pres‑sakratar Ministerstva achovy zdaroŭja Volha Šulpina zajaviła BiełaPAN, što nie moža «ni paćvierdzić, ni abvierhnuć» dadzienuju infarmacyju.
Pry hetym jana abvinavaciła žurnalistaŭ u «stvareńni masavaha psichozu» vakoł hetaha zachvorvańnia. «U nas štotydzień kolki čałaviek u respublicy źviartajucca pa miedycynskuju dapamohu z vostrymi reśpiratornymi zachvorvańniami? Niekalki tysiač.
My ž nie dajem štodzionnuju infarmacyju ab tym, kolki ŭ nas u respublicy infarktaŭ zdaryłasia. Navošta vy ŭźnimajecie ažyjataž vakoł hetaha śvinoha hrypu? Heta taki ž hryp, jak i luby inšy siezonny hryp, navat pieranosicca lahčej, latalnaść ad jaho mienšaja, čym ad zvyčajnaha siezonnaha hrypu», — skazała Šulpina.
Nahadajem, na siońniašni dzień aficyjna ŭ Biełarusi paćvierdžany šeść vypadkaŭ zaražeńnia virusam hrypu A/H1N1 — heta hramadzianin Kitaja, jaki ŭžo vypisany z balnicy, i piaciora dziaciej z Asipovickaha rajona, jakija viarnulisia paśla azdaraŭleńnia ź Vialikabrytanii.
Kamientary