Kiraŭnik MZS Azierbajdžana paviedamiŭ pra «surjoznyja pytańni» da Maskvy praz zakryćcio spravy ab katastrofie łajniera AZAL
Spynieńnie Śledčym kamitetam Rasii kryminalnaj spravy ab fakcie katastrofy samalota AZAL vyklikaje ŭ Azierbajdžana surjoznyja pytańni. Jak paviedamlaje Report, pra heta zajaviŭ ministr zamiežnych spraŭ Džejchun Bajramaŭ, adkazvajučy na pytańni žurnalistaŭ na bryfinhu ab vynikach hoda.
Pavodle słoŭ ministra, Śledčy kamitet Rasii nakiravaŭ u Azierbajdžan list z vynikami rasśledavańnia avijakatastrofy, źmiest jakoha vyklikaŭ ździŭleńnie:
— U liście ŭkazvałasia, što kryminalnaja sprava ŭžo spynienaja. Biezumoŭna, taki krok vyklikaje ŭ nas vielmi surjoznyja pytańni, — adznačyŭ Bajramaŭ, dadaŭšy, što na hety list byŭ nakiravany aficyjny adkaz adpaviednych azierbajdžanskich orhanaŭ.
Bajramaŭ padkreśliŭ: Azierbajdžan čakaje vykanańnia Rasijaj svaich abaviazańniaŭ u suviazi z hetym incydentam.
— Učora była hadavina trahiedyi, ja vykazvaju spačuvańni siemjam zahinułych. Fakt źniščeńnia samalota praz čas byŭ pryznany rasijskaj staranoj, a taksama było zajaŭlena ab vypłacie kampiensacyj. Heta była važnaja zajava. My čakajem, što hety praces budzie daviedzieny da kanca, — padkreśliŭ ministr.
25 śniežnia 2024 hoda samalot Embraer 190 «Azierbajdžanskich avijalinij» (AZAL), jaki vykonvaŭ rejs Baku — Hrozny, paciarpieŭ katastrofu za 3 km ad Aktaŭ u Kazachstanie. Na borcie samalota znachodzilisia 67 čałaviek. U vyniku katastrofy zahinuli 38 čałaviek.
Zhodna z papiarednimi źviestkami rasśledavańnia, pry padlocie da Hroznaha samalot atakavaŭ rasijski srodak SPA «Pancyr-S». Akramia taho, praz vykarystańnie rasijskim bokam srodkaŭ radyjoelektronnaj baraćby była całkam paralizavanaja sistema suviazi azierbajdžanskaha samalota. Z hetaj pryčyny bort źnik z radaraŭ u pavietranaj prastory Rasii.
Na sustrečy z prezidentam Azierbajdžana Ilchamam Alijevym u Dušanbe 9 kastryčnika prezident RF Uładzimir Pucin pryznaŭ, što spracavała rasijskaja sistema SPA i vypuščanyja dźvie rakiety ŭzarvalisia, źniščyŭšy azierbajdžanski samalot. Pucin abiacaŭ, što rasijski bok vypłacić usie naležnyja kampiensacyi i daść pravavuju acenku dziejańniam usich słužbovych asob.
Prezident Azierbajdžana Ilcham Alijeŭ nie prymaŭ udzieł u niefarmalnym samicie SND u Sankt-Pieciarburhu 22 śniežnia, chacia zvyčajna naviedvaŭ jaho. U administracyi azierbajdžanskaha prezidenta paviedamili, što jon nie budzie ŭdzielničać u samicie «praz ščylny pracoŭny hrafik».
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?50
Kamientary