U ZŠA źnik hienierał, jaki kiravaŭ sakretnymi prahramami Pientahona
U ZŠA ŭžo dva tydni šukajuć hienierał-majora VPS u adstaŭcy Uiljama Niła Makkasłanda, jaki raniej kiravaŭ šeraham sakretnych navukova-technałahičnych prahram Pientahona, paviedamlaje CNN.
68‑hadovy Makkasłand źnik ranicaj 27 lutaha. Jon vyjšaŭ z domu ŭ horadzie Albukierkie (štat Ńju-Mieksika) biez telefona, i z taho času pra jaho ničoha nie viadoma. Na nastupny dzień paśla źniknieńnia palicyja pačała pošuki, a paźniej da ich dałučyłasia FBR.
Padčas słužby ŭ armii Makkasłand zajmaŭsia raspracoŭkaj ekśpierymientalnych vajskovych technałohij. Jon byŭ hałoŭnym inžynieram prahramy GPS Ministerstva abarony ZŠA, kiravaŭ prajektam kaśmičnaha łaziera i kuryravaŭ śpiecyjalnyja prahramy ŭ Nacyjanalnym raźviedvalnym upraŭleńni. Taksama jon uznačalvaŭ daśledčuju łabaratoryju na avijabazie Rajt-Patersan, jakuju prychilniki teoryj pra NŁA źviazvajuć z vyvučeńniem mahčymych abłomkaŭ inšapłanietnaha aparata paśla incydentu ŭ Rozuele ŭ 1947 hodzie.
Paśla vychadu ŭ adstaŭku Makkasłand supracoŭničaŭ z kampanijaj To The Stars, zasnavanaj muzykam hurta Blink-182 Tomam Dełonham. Jana vyvučaje danyja pra nieapaznanyja pavietranyja źjavy.
Źniknieńnie hienierała adbyłosia praz tydzień paśla zajavy prezidenta ZŠA Donalda Trampa ab tym, što ŭłady pavinny rassakrecić dakumienty, źviazanyja z NŁA i mahčymym pazaziamnym žyćciom.
Žonka Makkasłanda, adnak, zaklikała nie raspaŭsiudžvać kanśpirałahičnyja viersii. Pavodle jaje słoŭ, hienierał vyjšaŭ u adstaŭku kala 13 hadoŭ tamu i nie vałodaje niejkimi «asablivymi sakretami» pra NŁA. Jana taksama adznačyła, što ŭ muža niama demiencyi i jon nie moh prosta zabłukać.
Palicyja pakul nie znajšła prykmiet złačynstva, ale razhladaje ŭsie mahčymyja viersii. U pošukach udzielničajuć dziasiatki ratavalnikaŭ i vałancioraŭ, vykarystoŭvajucca drony, viertaloty, słužbovyja sabaki, a taksama analizujucca zapisy z kamier videanazirańnia.
Ciapier čytajuć
Siarhiej Cichanoŭski pierabraŭsia žyć u Łos-Andželes38
Kamientary