Što viadoma pra eks-aficera Słužby biaśpieki Łukašenki Andreja Spasava, jakoha pasadzili za palityku
Andrej Spasaŭ — majstar sportu, desantnik. Da 2020 hoda jon pracavaŭ u Słužbie biaśpieki Łukašenki. Niadaŭna stała viadoma, što Spasava asudzili pa palityčnych kryminalnych artykułach. Dakładny termin prysudu pakul nieviadomy, ale fakt, što były aficer ciapier adbyvaje pakarańnie ŭ kałonii.
Andreju Spasavu 49 hadoŭ. Z samaha dziacinstva jaho žyćcio było nieparyŭna źviazana sa sportam. Junak paśpiachova skončyŭ Bresckaje vučylišča alimpijskaha reziervu i staŭ majstram sportu pa boksie.
Pracoŭny šlach Spasava ŭ siłavych strukturach pačaŭsia sa słužby ŭ vojsku, dzie jon trapiŭ u 38‑iu Bresckuju desantnuju bryhadu. Užo budučy majstram sportu, jon uvachodziŭ u zbornuju bryhady pa rukapašnym bai i šmatrazova pryvoziŭ miedali z roznych spabornictvaŭ.
Paśla zakančeńnia terminovaj słužby Andrej vyrašyŭ zastacca ŭ vojsku. Jon praciahnuŭ słužbu ŭ aficerskim atradzie śpiecyjalnaha pryznačeńnia, jaki paźniej pieradysłakavaŭsia ŭ Viciebsk. Heta paćviardžajuć i źviestki Belpol.
Znajomyja nazyvajuć jaho «voinam pa natury, jaki nie šukaŭ lohkaha chleba, a prosta chacieŭ zajmacca sapraŭdnaj mužčynskaj spravaj i abaraniać Radzimu».
Z časam karjera Andreja pajšła ŭharu — jon pierajšoŭ słužyć u Słužbu biaśpieki prezidenta. Sa słoŭ jaho znajomaha, hety krok byŭ pradyktavany nie žadańniem vysłužycca ci być bližej da Łukašenki, a tym, što ŭ hetym padraździaleńni isnavali dobryja ŭmovy dla prafiesijnaha raźvićcia.
Adnak u 2020 hodzie (ci navat krychu raniej) jon zvolniŭsia. Znajomy kaža, što heta adbyłosia praz toje, što aficer sutyknuŭsia z rečami, jakija nijak nie sumiaščalisia ź jaho paniaćciami pra honar i hodnaść. «Voin pa natury, jaki abraŭ honar», — kaža naš surazmoŭca. Paśla hetaha Andrej, miarkujučy pa jahonych sacsietkach, pracavaŭ na rabočych śpiecyjalnaściach — budaŭnikom, piečnikom, zvarščykam.
Viadoma taksama, što ŭ apošnija hady pierad 2020‑m Spasaŭ jeździŭ u kamandziroŭki ŭ Afryku ad «Biełhieapošuka».
Adnak niadaŭna stała viadoma, što mužčynu asudzili ŭ Minskim abłasnym sudzie. Dakładnyja abstaviny zatrymańnia i pieraśledu nidzie nie ŭspłyvali, ale viadoma, što heta adbyłosia ŭ druhoj pałovie 2025 hoda.
Andreja Spasava pryznali vinavatym pavodle častak 1 i 2 artykuła 361‑4 KK Biełarusi (sadziejničańnie ekstremisckaj dziejnaści). Zaraz były aficer znachodzicca ŭ kałonii.
«Naša Niva» — bastyjon biełaruščyny
PADTRYMAĆ
Kamientary