Z usioj krainy

 Z usioj krainy

Palavańnie na vaŭkoŭ

Vaŭka i dźviuch vaŭčych zabili palaŭničyja Smurhoniaŭ. Jany (a było ich bolej za try dziasiatki) abkłali čyrvonymi ściažkami terytoryju ŭ 10 km. I pahnali vaŭkoŭ. Adnaho paranili. Dy toj uciok.

Apošni raz hetkaje masavaje palavańnie było 13 hod tamu. Tady dva vaŭki stalisia achviarami miascovych Vilhielmaŭ Telaŭ.

Chłopčyk i lebiedź

Sakavickaj ranicaj smurhonskija medyki vyratavali lebiedzia, jaki prymierz da lodu vadaschovišča niedaloka ad miascovaha špitalu. Jaho zaharnuli ŭ ciopłuju koŭdru, dali pić i chleba. I jon adžyŭ.

U hety ž dzień tamsama znajšli 15-hadovaha chłopca. Jon zamierz, bo spaŭ pjany na bierazie — vypiŭ zamnoha ź siabrami. Tyja pajšli, a jon zastaŭsia i pamior.

Taciana Skarynkina, Smurhoni

Drama ŭ Baranavičach

Major milicyi ŭ adstaŭcy i pensijanerka, jakija adciahvali maładafrontaŭca Alesia Faleja ad mikrafonu padčas mitynhu na Dzień Voli ŭ Baranavičach (my pisali pra heta ŭ minułym numary), vyjavilisia jahonymi babulaj j dziedam, jakija bajalisia za ŭdzieł unuka ŭ palitycy.

Mikoła

Bieraściejcy — saznacielnyja

Kiraŭnictva Bieraściejskaj vobłaści vyrašyła nie vypłačvać zarobku ŭ kałhasach i saŭhasach da skančeńnia viesnavoje siaŭby. Hetyja hrošy nakirujuć na zakup paliva. Dla hetych samych metaŭ uviesnu va ŭsich dziaržraźlikovych pradpryjemstvaŭ Bieraściejščyny zabiraćmuć 1% ad prybytku. Pavodle słovaŭ staršyni abłsavietu Leanida Lemiašeŭskaha, sialanie z razumieńniem pastavilisia da rašeńnia nie vypłačvać im zarpłatu. «Jany lepš za inšych viedajuć, što ŭ vypadku zryvu viesnavych rabot moža adbycca niekiravanaja sytuacyja», — skazaŭ Lemiašeŭski.

Pavodle BiełaPAN

Rejd “Kraju”

24 i 25 sakavika – symbaličny źbieh dataŭ u historyi Biełarusi. 207 hod tamu pačałosia paŭstańnie pad kiraŭnictvam T.Kaściuški, a praz 124 hady była abvieščanaja niezaležnaść Biełarusi.

Bieraściejskaja rejdavaja hrupa arhanizacyi “Kraj” 24 i 25 sakavika naviedała miaściny, źviazanyja z hetymi datami. U Siachnovičach, rodavym majontku Kaściuškaŭ, da adzinaha ŭ Biełarusi pomnika pravadyru paŭstancaŭ jany ŭskłali vianok, pieravity bieł-čyrvona-biełaj stužkaj. Hetki samy vianok na Dzień Voli źjaviŭsia na mohiłkach žaŭnieraŭ vojska BNR hien.Bułak-Bałachoviča ŭ Bieraści.

Krajoviec

Šmon na mytni

Delehacyju Maładoha Frontu i Biełaruskaha Abjadnańnia Maładych Palitykaŭ (25 junakoŭ), što jechała ŭ Čechiju na seminar «Pieradvybarnyja technalohii», 4 hadziny nadhladali na biełaruska-polskaj miažy. Praviarali ŭsio — navat kasmetyčki, šminki, prakładki, termasy. Pieraharnuli ŭsie hazety, knihi, natatniki, prasłuchali aŭdyjokasety, prahledzieli videafilmy. Skanfiskavali viadomyja nalepki da akcyjaŭ, niekatoryja vydańni. Biełaruskuju moładź na seminary buduć vučyć nia tolki palitolahi, ale j českija senatary, deputaty, ministry, a taksama hrupa palitykaŭ z Danii. U ramkach seminaru projdzie dyskusijny forum «Jak zmahacca z dyktaturaj».

Pavodle BiełaPAN

“Vorša” –2001

Uviečary 29 sakavika kala budynku filarmonii adbyłasia žorstkaja sutyčka maładafrontaŭcaŭ dy BPSaŭcaŭ sa skinhiedami. Raniej vyrašeńnie “sprečnych pytańniaŭ” adbyvałasia adnosna spakojna, adnak, pačuŭšy šerah abrazaŭ u svoj bok, siabry BPS razahnali skinoŭ, paadbiraŭšy “zbroju” – draŭlanyja kały j dziahi. Usio adbyłosia hetak chutka, što navat milicyjantam, jakija źjavilisia krychu paźniej, ničoha na pažyvu nie zastałosia.

Jazep Kupcevič

Paciarpiełyja za Biełaruś

25 sakavika za razdaču ŭlotak u Bieraści byŭ zatrymany Viktar Kučynski. U Horadni byŭ zatrymany žurnalist Źmicier Jahoraŭ. U Homieli milicyja zatrymała dvuch udzielnikaŭ pikietu da Dnia Voli: staršyniu homielskaje supołki KCHP-BNF Uładzimiera Starčanku j aktyvistku hetaj arhanizacyi Alesiu Kacapavu. 26 sakavika ŭ Viciebsku byŭ zatrymany z hazetaj “Narodny prezydent” i nalepkami “Zubra” 17-hadovy Alaksiej Alšanka. U toj ža dzień z asobnikami hazety “Naša Svaboda” była zatrymanaja Volha Karač. Prajšli sudy nad zatrymanymi na mienskim Dni Voli: na 10 nočaŭ aryštu asudžany siabar Maładoha Frontu ź Lidy Źmicier Čubarenka. Byli asudžanyja taksama Jazep Burko, Nina Jarmalinskaja, dacent pedinstytutu Viktar Biekiš, namieśnik staršyni haradzkoj arhanizacyi AHP Uładzimier Ramanoŭski, lidčuk Źmicier Kuźmicki. Studentu medyčnaj vučelni Maksimu Kuksu dali štraf 114 tys., stolki ž — i stamatolahu Elinie Novik, jakaja pryjechała ŭ Miensk sa Słuččyny (jaje amonaŭcy zaciahnuli ŭ aŭtobus tolki za toje, što jana nie addavała im bieł-čyrvona-biełaha ściažka), na stolki ž pakarali i pensijanera Michała Vałočku, i deputatku Ludmiłu Hraznovu. 27 sakavika paśla performansu pratestu suprać chłuśni na BT byŭ zatrymany Pavał Sieviaryniec. 29 sakavika padčas futbolnaha matču Biełaruś — Narvehija byŭ zatrymany Alaksandar Atroščankaŭ. 30 sakavika ŭ Bieraści za razdaču specvypusku «Našaj Svabody» zatrymali maładafrontaŭcaŭ Sieržuka Bachuna, 15-hadovaha Jaŭhiena Plaško i 17-hadovaha Andreja Chomiča. U Mahilovie vyklučyli z universytetu aktyvistku Maładoha Frontu Hannu Ziuzinu, studentku fiłfaku. Čakajucca zatrymańni Viktara Ivaškieviča, Viačasłava Siŭčyka, Alaksieja Karala, Cimocha Drančuka, Uładzimiera Kiškurny, Piatra Hołasava i Siarhieja Michnova za ŭdzieł u šeści 25 sakavika.

Tancy ŭ volny dzień

Na “Volnych Tancach”, što adbylisia 24 sakavika ŭ “Akvaryjumie”, tradycyjna sabralisia biełaruskija rok-hurty, kab adznačyć Dzień Voli.

Z aznačeńnia “rok” vyłučaŭsia chiba “Stary Olsa”, što ŭ hety dzień byŭ pradstaŭleny adnoj asobaj — čałaviekam-arkiestram ź dźviuma dudami, na jakich jon hraŭ i muzyku ChVI st. (balady j “biasiednyja” pieśni, u rytm jakich treba stukać kubkam pa stale), i svaje sučasnyja tvory, jakija słuchalisia hetak ža aŭtentyčna i žyva.

Potym byŭ zahadkavy Zet, jaki mienš čym za hod staŭsia lideram biełaruskaha hard-koru. Asabliva padčas vystupu ŭraziła nieŭtajmavanaść rytm-sekcyi i nie abmiežavanyja ramkami stylu mahčymaści vakalista. Zet robicca ŭsio bolš papularnym u andehraŭndavych kołach, dzie maje imidž novaha NRM-u.

«Novaje Nieba» ŭ čarhovy raz viarnułasia z “Łastaŭkaj”, “Cepelinami” i “Prezydentam”, jakoha pakul jašče aktualna zaklikać iści damoŭ. Kasia śpiavała jak nikoli pryhoža i rokava.

«Bieź Bileta» praanansavali svoj solny vystup na Dzień durnia dy vykanali “Maju krainu Biełaruś”, pa mahčymaści tradycyjna — razam sa słuchačami, čaho tradycyjna ž i dasiahnuli.

Absalutna novyja pieśni prapanavaŭ słuchačam «Ulis», jaki znachodzić usio novyja šlachi dla svaich biaskoncych padarožžaŭ pa muzyčnych prastorach. Ale teksty sa zvarotam da ŭjaŭnaha biełarusa nie vyklikajuć ni aptymizmu, ni adčuvańnia śviata — “ty zabivaješ siabie…”, “zamarožany…”.

Zaklik Siarhieja Bialeviča z BMA dy Kasi Kamockaj hodna adznačyć zaŭtrašni Dzień Voli byŭ pryniaty da viedama prysutnymi, bo na niadzielnych narodnych hulańniach možna było pabačyć bolšuju častku jak muzykaŭ, hetak i słuchačoŭ.

Viktoryja Łastaŭkina

naviny haspadarskija

Tarmažeńnie

Pavodle źviestak ministerstva statystyki, ekanamičny “ŭzdym” krainy spyniŭsia. Za studzień-luty 2001 h., u paraŭnańni ź letašnimi pakaźnikami, ahulny vałavy ŭnutrany pradukt pavialičyŭsia ŭsiaho na 0,6%.

Adnak zališnie dramatyzavać sytuacyju niama padstavaŭ. Uviesnu minułaha hodu ŭrad narešcie advažyŭsia skaracić druk pustych hrošaj, i mnohija pradpryjemstvy stracili mahčymaść naroščvać abjomy vytvorčaści dziakujučy niaspynnaj inflacyi. Statystyčnyja pakaźniki rostu prosta nablizilisia da realnych.

Adnačasova na miažy bankructva apynułasia pałova pradpryjemstvaŭ krainy. Znos asnoŭnych vytvorčych fondaŭ daŭno pierasiahnuŭ krytyčnyja 70%. Navat ministar ekanomiki sp.Šymaŭ užo nie chavaje praŭdy: biez aktyŭnaj madernizacyi vytvorčaści hod praź piać možna… stracić pramysłovaść. Kraina ŭvohule ryzykuje zastacca bieź biudžetu.

“Nacyjanalnaja ekanamičnaja ideja”, ab pačatku pošuku jakoj znoŭ było abvieščana na minułym tydni, nabyvaje hetym razam bolš-mienš kankretnyja abrysy: vyznačyć dla Biełarusi niekalki adnosna kankurentazdolnych na suśvietnych rynkach halinaŭ (sielskahaspadarčaje mašynabudavańnie, lohkaja pramysłovaść i h.d.) i metanakiravana ŭkładać u ich srodki — stvarać svojeasablivy “padmurak”. A ŭžo potym dapamahać sferam z patencyjna nizkaj rentabelnaściu.

Pry kancy 80-ch — pačatku 90-ch takija reformy adbyvalisia va Ŭschodniaj Eŭropie, ale tam, kab paźbiehnuć vybuchu biespracoŭja siarod rabotnikaŭ “nieperspektyŭnych” pradpryjemstvaŭ, usialak zaachvočvali pradprymalnictva. A ŭ nas “svoj šlach” — čarhovuju pierarehistracyju (jaje termin skončycca 1 lipienia) prajšli tolki 40% pryvatnych biznesoŭcaŭ Miensku. Što kazać pra inšyja, mienš “rynkavyja” rehijony Biełarusi?

Siaržuk Ivanoŭski

spartovy tydzień

Patryjoty

Na spravazdačnaj schodcy Nacyjanalnaha alimpijskaha kamitetu ŭpieršyniu prahučała ličba medaloŭ, što planujecca prypierci ŭzimku z alimpijady ŭ Sołt-Łejk-Syty — try. Našyja asnoŭnyja nadziei — bijatlon dy frystajł.

Małafiejeŭ, padobna, rychtuje Biełarusi novy 1982 h. Nacyjanalnaja družyna ŭ sieradu na apošniaj chvilinie, dziakujučy niazhrabnamu, ale ŭsio ž hołu Ramana Vasiluka vyrvała pieramohu ŭ narvežcaŭ. Pierapoŭnieny stadyjon “Dynama” byŭ u ekstazie. Čakajem pačatku leta dy vizytaŭ u Jerevan dy Osła.

A chakieisty ź miačom ad dušy paviesialili. Na čempijanacie śvietu biełarusy prajhrali 5 hulniaŭ — zakinuli tolki 1 miač, prapuściŭšy ažno 92... Treba pry hetym adznačyć vartuju hulniu biełarusaŭ suproć rasiejskaj zbornaj, adzinuju, jakuju našy prajhrali nie z dvuchznačnym likam, dy ŭ jakoj, da taho ž, biełarusy zakinuli svoj unikalny miač. Patryjoty!

Baskietbalisty “Horadni-93”, čempijony Biełarusi, nia vyjhrali chatniaha turniru za prava ŭdziełu ŭ prestyžnaj Paŭnočnaeŭrapiejskaj baskietbolnaj lizie. Eŭropa pakul jak-niebudź pierabjecca biaź ich.

Bohuś Bijatlanionak

žart

Pieraabrali na druhi termin prezydenta Alimpijskaha kamitetu adnoj siniavokaj krainy. Z hetaje nahody byŭ zładžany bankiet u kole paplečnikaŭ. I ŭ paryvie ŭdziačnaści da elektaratu prezydent skazaŭ:

— Nu što, tavaryšy? U kožnaha z vas jość svoj majontačak, działka, inšamarka. Ciapier čas i pra narod padumać!

Pačulisia apladysmenty. Paśla apladysmentaŭ prahučeŭ hołas:

— Adabrajem, Alaksandar Ryhoravič! Nu choć by z duš ź dziesiać dla pačatku možna…

Tak skazaŭ Łukašenka

“Rychtujcie parad, pryvodźcie ŭsio ŭ ruch. Heta pavinien być najlepšy ahlad našych Uzbrojenych Siłaŭ. Vy pavinny pakazać navat toje, čaho my nikoli nia bačyli i nia ŭmiejem rabić. Vydumvajcie, rabicie i pakazvajcie narodu, što vy možacie jaho abaranić”.

A pra hienerała Čumakova jon skazaŭ, što toj — «čałaviek absalutna nadziejny, što niemałavažna było ŭčora i asabliva — siońnia». «Heta čałaviek, jaki jak moh, tak słužyŭ, — kanstatavaŭ A.Łukašenka. — Ja nie mahu jamu pradjavić pretenzij, bolej čym jon zasłuhoŭvaje. Hety čałaviek svaju rolu vykanaŭ”.

Pavodle BiełaPAN