«Беларусь зробіць усё, каб пазбегнуць канфлікту на мяжы». Макей зрабіў міралюбівую заяву праз расійскае агенцтва
Беларусь прыме самыя рашучыя меры, каб не дапусціць канфлікту на беларуска-польскай мяжы, заявіў 11 лістапада міністр замежных спраў Беларусі Уладзімір Макей.
Гэтая заява прагучала ў інтэрв'ю расійскаму дзяржаўнаму агенцтву РІА «Новості».
«Мы катэгарычна не хацелі б узнікнення нейкіх канфліктаў на нашай тэрыторыі і пастараемся зрабіць усё, каб не дапусціць іх, і, натуральна, будуць прынятыя самыя рашучыя меры», — сказаў ён.
Кіраўнік МЗС Беларусі адзначыў, што «сёння ніхто нічога не можа гарантаваць», як будзе разгортвацца сітуацыя на мяжы. «Сёння свет настолькі непрадказальны, у першую чаргу, у сілу нейкіх сітуацыйных рэагаванняў на выклікі і пагрозы з боку нашых еўрапейскіх партнёраў, што нельга сказаць нешта пэўнае», — дадаў міністр.
Учора адбылася размова Ангелы Меркель з Уладзімірам Пуціным па сітуацыі на беларуска-польскай мяжы. Адначасова Урсула фон дэр Ляен падняла гэтую тэму на перамовах з Джо Байдэнам у Вашынгтоне.
У сваю чаргу, расійскія атамныя бамбардзіроўшчыкі праляцелі над Беларуссю ўздоўж польскай мяжы.
Варшава папярэдзіла Мінск пра гатоўнасць цалкам закрыць беларуска-польскую мяжу для руху грамадзян і тавараў у выпадку эскалацыі канфлікту Мінскам.
Еўрасаюз жа абмеркаваў магчымасць увядзення санкцый супраць кампаній трэціх краін, якія ўдзельнічаюць у дастаўцы мігрантаў у Беларусь. Гаворка ў тым ліку пра расійскі «Аэрафлот».
Цяпер чытаюць
21‑гадовага курсанта Акадэміі авіяцыі асудзілі за Гаюна1
21‑гадовага курсанта Акадэміі авіяцыі асудзілі за Гаюна
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары