«Не бяжы. Ты не зможаш…» На ўскрайку Гродна ходзіць мядзведзь, улады выступілі з папярэджаннем
На ўскрайку Гродна паміж Гожай і Зарыцай мясцовыя жыхары заўважылі мядзведзя. Інфармацыю афіцыйна пацвердзілі ў Гродзенскім аблвыканкаме.
«На месца выязджалі спецыялісты мясцовага лясгаса. Інфармацыя пацвердзілася: паляўніцтвазнавец знайшоў свежыя сляды мядзведзя», — паведамляе канал кіраўніка вобласці Юрыя Караева.
Гэта надзвычайная сітуацыя для рэгіёна — мядзведзі ў Гродне яшчэ не з’яўляліся.
«Такога яшчэ не было», — пацвярджаюць у аблвыканкаме.
Чыноўнікі запэўніваюць: «сітуацыю трымаюць на кантролі профільныя ведамствы».
Але пакуль заклікаюць «улічваць гэту інфармацыю», то-бок наяўнасць мядзведзя ў рэгіёне.
Што рабіць, калі вы ўбачылі мядзведзя?
«Калі вы ўсё ж такі ўбачылі мядзведзя — спыніцеся, захоўвайце спакой і ацаніце сітуацыю. Не паварочвайцеся спінай, не глядзіце яму ў вочы, але кантралюйце паводзіны жывёлы», — гаворыцца ў рэкамендацыях.
«Не бяжыце. Вы не зможаце ўцячы ад мядзведзя. Адыходзьце павольна, на адлегласць каля 10—20 метраў і толькі потым можна адыходзіць убок».
Таксама рэкамендуюць не падаваць выгляду, што вы можаце быць пагрозай, але пры гэтым варта выдаваць гукі — свістаць, пляскаць у далоні.
Каментары