Lidar nacyjanalnaj zbornaj Biełarusi pa mastackaj himnastycy Mielicina Staniuta płanuje zaviaršyć spartyŭnuju karjeru ŭ bližejšy čas. Pra heta spartsmienka, jakoj 15 listapada spoŭnicca 23 hady, raspaviała ŭ intervju BiełaPAN. Pryčynami hetaha rašeńnia Staniuta nazvała staruju traŭmu i bol u levaj stupni, a taksama toj fakt, što jana «bolš nie znachodzić u himnastycy natchnieńnia».
Mielicina Staniuta. Fota s5o.ru
«Stupnia mocna balić. Paśla Alimpijady stała baleć bolš, pryčym bol źjaviŭsia ŭ tym miescy, u jakim raniej jaho nie było. Ja spadziavałasia, što za adpačynak jon projdzie, pakolki nahruzak na stupniu nie budzie. Nie prachodzić. Na levaj nazie ja nie mahu rabić peŭnyja elemienty. Štości rabić z hetaj šmatpakutnaj stupnioj ja nie vielmi chaču. Plus mnie chutka 23 hady — heta ŭsio ž taki ŭzrost dla himnastyki.
Ja 20 hadoŭ u sporcie. Ad 1996 hoda ja baču hetyja sceny, hetuju zału. U mianie, napeŭna, užo niama emacyjnaha zaradu, jaki b davaŭ psichałahičnyja siły praciahvać. Ja nie znachodžu bolš u himnastycy natchnieńnia. Unutrany hołas mnie ŭsio nastojliviej kaža, što bolš ja zajmacca hetym nie chaču», — kankretyzavała Staniuta.
Pa słovach spartsmienki, jana ciažka pieražyvała niaŭdałaje vystupleńnie na Alimpijadzie ŭ Rya-de-Žaniejra. Na Hulniach-2016, na jakich Staniuta razhladałasia adnoj z hałoŭnych favarytak, jana nie zmahła zavajavać uznaharodu praz dapuščanuju pamyłku — vypuściła bułavu padčas vystupu.
«Kali my abmiarkoŭvali heta z hałoŭnym trenieram Irynaj Laparskaj, jana skazała: «Mielicina, ja nie mahu dać nijakaha tłumačeńnia taho, što ty vypuściła bułavu. Ty była hatovaja nastolki dobra, nakolki heta ŭvohule mahčyma», — raspaviała spartsmienka.
«Ja i sama razumieju, što heta pamyłka — heta niejki nonsens, — ličyć Staniuta. — Dajcie mnie mahčymaść paŭtaryć vystup, ja zrablu jaho biezdakorna sto, dźvieście, trysta razoŭ. Ja nie viedaju, čamu los tak skłaŭsia, čamu jon daŭ mnie takoje vyprabavańnie, a heta sapraŭdy było surjoznaje vyprabavańnie dla mianie. Razumiejecie, na Alimpijadzie ŭ Łondanie ja nie była nastolki hatova, jak na hetaj Alimpijadzie. Ja nastolki adkazna i paŭnavartasna rychtavałasia da Hulniaŭ u Rya, što navat nie mahu sabie ŭjavić, što možna było jašče zrabić u płanie padrychtoŭki. Ja zrabiła ŭsio! Ja lepš nie mahu! Z adnaho boku, heta kryŭdna, što ty zrabiła absalutna ŭsio, ale zastałasia bieź miedala. A z druhoha boku, kali ty zrabiła ŭsio, za što siabie dakarać? Ja siabie supakojvaju tak: značyć, majo ščaście nie ŭ hetym. Plus ja liču, što moj hałoŭny miedal u himnastycy — heta nie fakt najaŭnaści alimpijskaj uznaharody, a hladackaja luboŭ i ŭvaha», — skazała himnastka.
Mielicina Staniuta źjaŭlajecca šmatrazovym pryzioram čempijanataŭ śvietu i Jeŭropy, zasłužanym majstram sportu Biełarusi.
Ciapier čytajuć
«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?13
Kamientary