«Anłajnier» złaviŭ firmu Kurjana na płahijacie videa. Kurjan: «Kalehi mahli b pastavicca z razumieńniem»
Žurnalist sajta onliner.by Alaksiej Nosaŭ apublikavaŭ u svaim fejsbuku tekst, u jakim abvinavačvaje viadomaha televiadučaha Dzianisa Kurjana ŭ płahijacie videa «Anłajniera».
«Jość u krainie davoli viadomy televiadučy Dzianis Kurjan, vałodaje studyjaj videavytvorčaści «Promofilm», dzie jon vykanaŭčy pradziusar, — piša Nosaŭ. — Zdymajuć roznyja proma-roliki za niemałyja hrošy. I vyrašyŭ ja aznajomicca ź ich reziume. Uklučaju rolik pra karjer u Mikaševičach i baču tam svaje kadry, jakija my na «Anłajniery» zdabyvali bolš za miesiac dla repartažu. Karaciej, voś para skrynšotaŭ dla paraŭnańnia. Chłopcy z «Promafilma» robiać svaju rabotu tak «jakasna», što prosta kraduć čužyja videa dla kamiercyjnych metaŭ. Abrezać łahatyp, zrabić kolerakarekcyju, i ŭsio — materyjał aŭtarski».
Na padadzienych kadrach sapraŭdy frahmienty z videa «Anłajniera», na jakich adlustravany praces padryvu parod.
Pry hetym, jak vynikaje z prajsa na sajcie «Promafilma», cana na samy tanny rolik pačynajecca ad 5 tysiač rubloŭ, na samy darahi dasiahaje 20 tysiač i vyšej.
Što zmusiła Kurjana zarablać na čužoj rabocie?
Jak zapeŭnivaje sam Dzianis, situacyja padadzienaja nie zusim karektna, i «treba raźbiracca».
«Sprava ŭ tym, što hetaje pradpryjemstva, dla jakoha my rabili rolik, raniej puściła na svaju terytoryju inšuju zdymačnuju hrupu, jakaja i źniała hety vybuch — havorka ŭvohule idzie pra 10 «čužych» siekund u 6-chvilinnym videa. I łahična, što pradpryjemstvu hetyja kadry spadabalisia, jany chacieli ich vykarystać u svaim imidžavym roliku. I jany nam hetyja kadry pradastavili z dazvołam ich vykarystać. Čyjo heta videa, ja nie viedaŭ. Umoŭna, jano moža być źniataje i rabočym na mabilny. Nu my ich i vykarystali. I ciapier, viadoma, my damo asobnuju spasyłku na aŭtara. Ale mnie zdavałasia, što kalehi mohuć pastavicca da hetaha z razumieńniem, a nie razdźmuvać siensacyju. Havorka pra toje, što jany źniali heta nie na vulicy, dzie kožny moh źniać, a na terytoryi pradpryjemstva, jakoje vydała admysłovy dazvoł na znachodžańnie pry pracesie, jaki adbyvajecca paru razoŭ na hod. My sami fizična nie mahli heta źniać, ale zamoŭca chacieŭ bačyć hetyja kadry», — skazaŭ Kurjan.
Kiraŭnictva ž «Anłajniera» pakul vyznačajecca sa svajoj reakcyjaj na fakt płahijatu.
Kamientary