Pamiatajecie studentku EHU, jakaja zmahałasia suprać charasmientu vykładčyka? Jana prajhrała sud i vinnaja ŭniviersitetu 8 tysiač jeŭra
U 2023 hodzie ŭ EHU vybuchnuŭ skandał: mastaka i vykładčyka Siarhieja Sialeckaha abvinavacili ŭ nieetyčnych pavodzinach u dačynieńni da studentak i praź niekalki miesiacaŭ raźbiralnictva zvolnili. Taćciana Barysava była adnoj sa studentak, jakaja paskardziłasia na Sialeckaha publična. Praŭda, hetym sprava nie skončyłasia.
Pa vyniku atrymałasia tak, što z univiersiteta adličyli samu Barysavu, a pieršapačatkova zvolnieny vykładčyk byŭ adnoŭleny na pracy pa rašeńni suda. Dziaŭčyna taksama pajšła ŭ sud, kab jaje adličeńnie pryznali niezakonnym — jaje sapraŭdy viarnuli ŭ EHU, ale zaraz univiersitet vyjhraŭ apielacyju i śpisaŭ ź jaje 8 600 jeŭra.
«Pieršy sud pa maim adličeńni ja viała sama — sama pisała ŭsie teksty (aproč raźliku škody), vyklikała śviedak, vystupała — i vyjhrała častkova. Ale apielacyju, jakaja prachodzić piśmova i zavočna, ja całkam addała dziaržaŭnamu advakatu i nie pračytała nivodnaha tekstu sa spravy, aproč finalnych abzacaŭ — vypłacić 7719,62 univiersitetu za advakata. Tak užo atrymałasia, što ŭvieś hety čas ja pracavała jak koń, časam pa 240 hadzin u miesiac — tamu nie zastavałasia ni času, ni sił na čytańnie sudovych tekstaŭ, nie kažučy ŭžo pra napisańnie», — raskazała Taćciana ŭ svaim fejsbuku.
«Ciapier praz prystava maje rachunki vyviedzienyja ŭ minus 8 500 (aproč EHUšnych hrošaj, jość jašče nacenka prystava)».
Taćciana nie razumieje, jakija mahli być arhumienty na karyść taho, kab sud pryznaŭ jaje raniejšaje adličeńnie zakonnym. Niahledziačy na niaprostuju žyćciovuju situacyju, jana nie adčajvajecca:
«Kali ja i dalej letam budu varočać kamiennuju vatu i dziaŭbci łomam hrunt u svaje vychodnyja (dziakujučy čužym balničnym i adpačynkam), to mienš čym praz hod vyjdu ŭ plus — zarpłata ŭ mianie vydatnaja, i sama praca taksama. Kali što, paśpieła źniać hrošy na arendu kvatery na maj, tak što ŭ bližejšy čas biazdomnaj nie stanu».
Nahadajem, Taćciana razam ź inšymi studentkami raskazała pra prynižeńni z boku Sialeckaha. Pa jaje słovach, vykładčyk źnievažaŭ jaje za nacyjanalnaść i finansavaje stanovišča (dziaŭčyna rodam z Rasii i na toj čas adna vychoŭvała maleńkaha syna), raspaŭsiudžvaŭ pra jaje čutki.
Paśla intervju Taćciany Sialecki padaŭ na jaje skarhu va ŭniviersiteckuju kamisiju pa etycy, dziaŭčyna adkazała adkrytym listom da ŭniviersiteckaj supolnaści. Dalej skarhu na jaje padaŭ sam rektar, i ŭ śniežni 2023‑ha Taćcianu adličyli. Paźniej vilenski sud admianiŭ toje rašeńnie, adnak pa vyniku jano ŭsio ž było pryznanaje zakonnym, i dziaŭčyna zastałasia vinnaja EHU hrošy za advakata.
Ciapier čytajuć
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva1313
Kamientary