Былы кароль Бельгіі прызнаў пазашлюбную дачку, ад якой адмаўляўся 20 гадоў
Экс-кароль Бельгіі Альберт II на падставе тэсту ДНК прызнаў 51-гадовую бельгійку Дэльфіну Боэль сваёй пазашлюбнай дачкой, піша bbc.com.
Дэльфіна — мастачка і скульптар. Па словах яе адвакатаў, зыход цяжбы — вялікая палёгка для яе. Яна афіцыйна прызнаная чацвёртым, наймалодшым дзіцем Альберта II.
«[Яму] сталі вядомыя вынікі ДНК-тэсту, і навуковае заключэнне паказвае на тое, што ён — біялагічны бацька спадарыні Дэльфіны Боэль», — гаворыцца ў афіцыйнай заяве юрыстаў 85-гадовага экс-караля.
Чуткі пра тое, што ў караля ёсць пазашлюбнае дзіця, хадзілі ў Бельгіі ад 1999 года, калі ў свет выйшла біяграфія яго жонкі, каралевы Паолы.
Аўтарам біяграфічнай працы стаў 18-гадовы вучань школы Марыё Данілс, які называў сябе гісторыкам. Нягледзячы на яго маладосць і непрафесіяналізм, газеты ўхапіліся за яго здагадку аб пазашлюбных прыгодах караля.
У 2005 годзе ў інтэрв'ю прэсе Дэльфіна Боэль заявіла, што яна і ёсць тое самае пазашлюбнае дзіця. Але зрабіць далейшая крокі яна не магла, бо кароль меў імунітэт ад судовых разглядаў.
Барацьба за афіцыйнае прызнанне бацькоўства стала магчымай толькі ў 2013-м, калі пасля 20-гадовага кіравання Альберт II вырокся трону па стане здароўя і, адпаведна, пазбавіўся імунітэту.
Маці Дэльфіны, баранэса Сібіла дэ Сэліс Ланшан распавяла, што яе раман з тады яшчэ прынцам Альбертам доўжыўся паміж 1966 і 1984 гадамі.
У 2018 годзе суд прызначыў Альберту II тэрмін у тры месяцы, на працягу якіх ён павінен быў даць узор для генетычнай экспертызы. Аднак былы манарх адмаўляўся праходзіць ДНК-тэст, пакуль суд не пастанавіў спаганяць з яго па 5 тысяч еўра за кожны дзень пратэрміноўкі.
«Усё яе жыццё было начным кашмарам з-за таго, што яна спрабавала высветліць сваю ідэнтычнасць. […] У яе быў біялагічны бацька, які жорстка адпрэчыў яе, калі гісторыя пра яго бацькоўства стала здабыткам грамадскасці», — патлумачыў адвакат Боэль.
Паводле яго слоў, яго кліентка наважылася на судовую цяжбу, каб пазбавіць сваіх дзяцей ад цяжару няпэўнай сітуацыі, з якой доўга жыла сама.
Паводле некаторых звестак, штогадовы даход Альберта II складае каля мільёна еўра.
Экс-манарх мае намер уключыць Боэль у завяшчанне на роўных правах з астатнімі трыма дзецьмі.
Каментары