Арастовіч патлумачыў, чаму не баіцца сцэнарыя з расійскім стаўленікам на месцы Лукашэнкі

На думку Аляксея Арастовіча, якую ён выказаў у інтэрв'ю ютуб-каналу «Фейгин LIVE», у выпадку смерці Лукашэнкі ўзнікне рэзкае абвастрэнне ўнутранай і знешнепалітычнай сітуацыі вакол Беларусі. І наступствы гэтага абвастрэння невядомыя.

Ён адзначае дзве групы меркаванняў. Першая — Масква зараз жа паспрабуе паставіць сваю марыянетку і акупаваць Беларусь. Другая — у Беларусі пачнуцца працэсы, якія дазволяць «вырвацца з кіпцюроў» Масквы.

Былы дарадца Офіса прэзідэнта Украіны не верыць у хуткую акупацыю Беларусі. І тлумачыць, чаму.

У Расіі, на яго погляд, няма ніводнага свабоднага сілавіка на тое, каб «нешта там акупаваць, стабілізаваць і кіраваць».

Па-другое, як адзначае Арастовіч, настроі ў Беларусі катэгарычна супраць уступлення ў вайну ў любой форме і знаходжання ў гэтай вайне.

«Лукашэнка, калі ўтрымліваў беларускую армію ад уступлення ў вайну, ён апеляваў да меркавання народа ў гэтым. Усе беларусы разумеюць, што ім дакладна не трэба ў гэтую вайну ўступаць. І не таму, што ён [Лукашэнка] такі залаты і яхантавы. (…) Тут на рэдкасць супалі меркаванні».

Арастовіч не думае, што новы кіраўнік, «незалежна ад таго, марыянетка, ці не, зможа пераламаць трэнд і прымусіць беларусаў ваяваць». Таму ён не вельмі асцерагаецца смерці Лукашэнкі і не верыць, што гэта можа прывесці да ўступлення Беларусі ў вайну. Хутчэй, наадварот:

«Смерць Лукашэнкі ўтрымлівае ў сабе вельмі моцную магчымасць для контргульні. Увесь клан Лукашэнкі будзе знесены. Прыйдуць нейкія палітыкі, якія не могуць не быць кампраміснымі, таму што сілай цяпер у Беларусі ўладу не навяжаш. Чыста маскоўскага стаўленіка там не будзе ва ўмовах, якія там склаліся. І таму ёсць нядрэнны шанец на тое, што ва ўладу прыйдуць людзі з іншым пунктам гледжання адносна Масквы. І з іншым пунктам гледжання адносна Украіны. Яны дакладна не зацікаўленыя ў вайне».

Аляксей Арастовіч лічыць, што смерць Лукашэнкі значным чынам паўплывала б на ход гэтай вайны. А таксама прывяла б да поўнага перафарматавання сітуацыі ў Беларусі і, адпаведна, ва ўсіх сумежных краінах па беларускім вектары. Ён лічыць, што на падзеі, якія разгорнуцца ў Беларусі, ва Украіны таксама будзе шанец паўплываць дыпламатычным шляхам.

Былы дарадца Офіса прэзідэнта Украіны адзначае, што ён «больш асцярожны аптыміст у гэтым пытанні, чым песіміст адносна таго, што 40 тысяч беларускіх салдат пабягуць ваяваць з Украінай».

У канцы сваіх разваг Аляксей Арастовіч яшчэ раз падкрэсліў, што не верыць у тое, што Беларусь стане прамаскоўскай: «Там няма такога патэнцыялу ад слова наогул. Чаго яны не хочуць, дык гэта станавіцца прамаскоўскімі. Тым больш, прамаскоўскімі ў варыянце вайны з Украінай».

Чытайце яшчэ:

Арастовіч лічыць, што магчымая другая расійска-ўкраінская вайна. І назваў меркаваныя даты

Арастовіч расказаў, як на пачатку вайны заходнія палітыкі чакалі ад Украіны кампрамісу

• 113
• 0
• 8
• 7
• 3
• 1
• 14
• 0