«Трымайце сваіх кіеўскіх гадаванцаў пад кантролем». Прадстаўнік Беларусі ў АБСЕ выступіў з хамскай прамовай

Повадам для выступу Дапкюнаса стаў ультыматум, які прэзідэнт Украіны Уладзімір Зяленскі паставіў перад Лукашэнкам, патрабуючы спыніць працу рэтранслятараў, што выкарыстоўваюцца для навядзення расійскіх беспілотнікаў. Учора Зяленскі заявіў, што гэтыя прылады ўжо не працуюць.

«Тыдзень таму, натхнёны падбухторніцкімі стасункамі з безмандатнай еўрапейскай «тройкай» і вялікай глабальнай «сямёркай», кіраўнік фактычнага кіраўніцтва Украіны выставіў Беларусі ўльтыматум. Упершыню за чатыры з паловай гады з пачатку ваеннай аперацыі ва Украіне чалавек, які прыйшоў да сваёй пасады на абяцанні народу Украіны ўрэгуляваць адносіны з Расіяй, адкрыта пагражае прымяненнем ваеннай сілы краіне, якая не з’яўляецца бокам канфлікту.

У апошнія дні ўвесь свет самааддана спрабуе адчуць усё хараство трапнай характарыстыкі «містэр Бін пад крэкам». Трагедыя ў тым, што смешнае ў гэтым выпадку не выклікае ўсмешкі. Гэта, хутчэй, смех скрозь слёзы. У Беларусі, калі ў кагосьці яны і былі, рассеяліся апошнія ілюзіі адносна таго, што суседняй дзяржавай кіруюць адказныя дзяржаўныя дзеячы, якіх сапраўды хвалюе дабрабыт свайго народа», — сказаў ён.

«Сёння, як і тры тыдні таму, калі Беларусь падняла ў Пастаянным савеце пытанне аб дзяржаўным услаўленні ва Украіне нацыяналістаў, якія супрацоўнічалі з нацыстамі і былі датычныя да масавых забойстваў, беларускі бок не звяртаўся да дэлегацыі Украіны.

Там нас не пачуюць. Не пачуюць дакладна так сама, як Зяленскі не пачуў заклік прэзідэнта Польшчы адмяніць сваё рашэнне аб прысваенні адной з воінскіх частак імя так званых герояў УПА.

Піяр-дэмарш пасля гэтага шэрагу прадстаўнікоў цяперашняга і былога дзяржаўнага кіраўніцтва Украіны, якія вярнулі ў знак салідарнасці з Зяленскім дзяржаўныя ўзнагароды Польшчы, гэта не сведчанне суверэннай сілы Украіны. Гэта ганебная прыкмета бяздушнай карумпаванай сістэмы», — дадаў ён.

Паводле яго слоў, кіраўніцтва Украіны не хвалюе, што УПА для многіх — сімвал «крыважэрнасці, забойстваў і варварства».

«Заходнім калегам заўсёды некамфортна, калі Беларусь і Расія і дзясяткі іншых дзяржаў гавораць пра неабходнасць барацьбы з неанацызмам, які падымае галаву. Вы працягнеце настойваць, што нашы асцярогі надуманыя? У Кіеве гавораць пра пагрозу з боку Беларусі, але на заклік Беларусі даць ацэнку нападу ўкраінскага дрона на аўтобус з беларускімі дзецьмі ў Бранскай вобласці ўкраінскія ўлады не знайшлі нічога лепшага, як выкарыстаць апошні аргумент хітрых махінатараў: «Я не я і кабыла не мая», — сказаў ён.

Дапкюнас заклікаў саюзнікаў Украіны паўплываць на кіраўніцтва краіны, суправадзіўшы заклік намёкамі на прымяненне ваеннай сілы да іх.

«Сёння мы звяртаемся не да ўладаў Украіны. Мы звяртаемся да ўладаў дзясяткаў дзяржаў, якія не даюць канфлікту ва Украіне сціхнуць. Мы звяртаемся з сур’ёзнай перасцярогай да людзей, якія не знаходзяцца пад уздзеяннем псіхастымулятараў, да людзей, якія не страцілі здольнасць думаць, да людзей, якіх усур’ёз хвалюе дабрабыт сваіх народаў. Апошняя выхадка фактычнага кіраўніка Украіны здольная стварыць найнебяспечнейшы прэцэдэнт. Менавіта паводле логікі Зяленскага ўсе віды простай і ўскоснай ваеннай падтрымкі Украіны ў канфлікце з Расіяй членамі рознага роду кааліцый — Рамштайна і так званых ахвотных, — у выпадку вашай абыякавасці і маўчання, могуць дэ-факта стаць падставай для прымянення вайсковай сілы да тых, хто аказвае такую падтрымку. Вы пра гэта задумваецеся? Вы гэтага хочаце?» — прыгразіў ён.

Ён адрасаваў сваё пытанне не кіраўніцтву Еўрасаюза, з пазіцыяй якога, паводле слоў Дапкюнаса, усё зразумела, а да краін ЕС.

«Наша пытанне да дзяржаў Еўропы, якія лічаць сябе суверэннымі і не страцілі здольнасць адстойваць свой дзяржаўны інтарэс. Ці з вашай згоды, ці без узгаднення з вамі робіць свае правакацыйныя заявы фактычны кіраўнік Украіны, мы не ведаем. Аднак важна ведаць, што ўкраінскае кіраўніцтва сёння стварае пагрозу не толькі для Беларусі. Яно стварае простую і відавочную пагрозу бяспецы вашых краін», — сказаў ён.

Далей Дапкюнас звярнуўся да прыёму абесчалавечвання ўкраінскага кіраўніцтва, параўнаўшы яго з сабакам.

«У большасці дзяржаў чалавек нясе адказнасць за шкоду, прычыненую яго жывёлай. Калі сабака пакусаў чалавека, не сабака, а яго ўладальнік нясе грамадзянскую, адміністрацыйную ці нават крымінальную адказнасць. Пакаранне няўхільнае. Вы выгадавалі, песціце і ўсімі сіламі падтрымліваеце свайго гадаванца. Вы свядома зрабілі свой выбар на карысць таго, каб зачаравацца «героем», які безумоўна даражыць сваім месцам у гісторыі, але лёгка ахвяруе вашым інтарэсам, вашай заклапочанасцю, вашай трывогай.

Зачароўвацца лёгка. Расчараванне, якое прыходзіць, калі стала зразумела, што кароль жа голы, можа быць вельмі балючым. Добра ўдумайцеся ў сэнс прымаўкі, якую нядаўна Зяленскаму адрасаваў прэзідэнт Беларусі: «як спяваюць, так і адпяваюць». Яна значна больш глыбокая, чым вам можа здацца на першы погляд.

Паважаныя сябры ўкраінскага кіраўніцтва (але не Украіны), дзеля ўласнай бяспекі і дабрабыту, трымайце сваіх кіеўскіх гадаванцаў пад кантролем і, пакуль не позна, думайце, паважаныя калегі, думайце», — падсумаваў Дапкюнас.

• 7
• 7
• 15
• 24
• 1
• 0
• 16
• 0