Пасля скаргі стукача з папулярных беларускіх сайтаў зніклі цэны ў далярах на машыны і кватэры
У красавіку некалькі папулярных беларускіх сайтаў з аб'явамі цалкам прыбралі цэны ў далярах. Цяпер трэба прывыкаць, што машына каштуе 75 тысяч рублёў, а кватэра, напрыклад, 300 тысяч. Вось у чым справа.
Так, з 23 красавіка цэны ў далярах зніклі на самай папулярнай пляцоўцы па продажы аўто ў Беларусі — av.by. Адміністрацыя сайта патлумачыла гэта рэкамендацыяй, атрыманай з боку Міністэрства антыманапольнага рэгулявання і гандлю.
Праз два дні аналагічныя змены ўвялі і на сайце abw.by, таксама спаслаўшыся на рэкамендацыі ад МАРГ.
Аўдыторыі, мяркуючы па каментарыях у сацсетках і на сайце abw.by, падобныя новаўвядзенні недаспадобы.
«Да гэтага немагчыма прывыкнуць», — піша чалавек у трэдс пад навіной av.by пра адмову ад даляраў у аб’явах.
«І як цяпер зразумець, што колькі каштуе?» — задаецца пытаннем іншы каментатар.
«Дык зрабіце галоўнымі BYN і крыху меншым паказвайце ў памеры USD», — раіць іншы. Праўда, менавіта такі варыянт, дзе вялікім і тлустым шрыфтам была ўказана цана ў рублях, а ніжэй у далярах, ужо даўно быў на сайце. І менавіта з гэтым сталі змагацца чыноўнікі.
Па такой схемай — асноўная цана ў беларускіх рублях, а даведкавая ў далярах — сайты працавалі апошнія дзесяць гадоў. Тады Мінгандлю паказальна заблакавала «Анлайнер», дзе цэны ўказваліся ў далярах. Уласнікам бізнэсаў давялося пайсці на саступкі. Цяпер жа ад іх патрабуюць цалкам схаваць цану ў замежнай валюце.
Пад навіной на сайце abw.by большасць каментатараў таксама крытыкуюць адмову ад дублявання цаны ў валюце.
«Вельмі нязручна», — піша адзін.
«Усё роўна пераводзяць усё ў даляры. Я ўпэўнены на 10000%. Проста зрабілі лухту для людзей. Карацей, толькі каб горш было», — дадае іншы.
А рэдкія каментары ў падтрымку набіраюць шмат дызлайкаў.
Чаму МАРГ пайшоў на такі крок?
Паводле МАРГ, да падобнага рашэння іх нібыта падштурхнуў зварот нейкага грамадзяніна, які паскардзіўся, што кошт нерухомасці на сайтах пазначаюць у замежнай валюце.
У сувязі з гэтым чыноўнікі ўжо выдалі 18 рэкамендацый інтэрнэт-рэсурсам, якія рэкламуюць турыстычныя паслугі, нерухомасць, аўтамабілі і іншыя тавары з указаннем цэн у замежнай валюце, прыбраць даляры.
Беларусы ж, па ўсёй бачнасці, адмаўляцца ад даляраў пры куплі-продажы аўто не гатовыя, таму ўжо нават паспелі распрацаваць пашырэнне для av.by у Google Chrome, якое будзе канвертаваць цэны згодна з курсам Нацбанка.
Пры гэтым пры ўсталёўцы падобных дадаткаў варта быць пільнымі: такія пашырэнні могуць рабіць і распаўсюджваць у тым ліку махляры.
Чаму беларусам важныя цэны ў далярах?
Нягледзячы на тое, што апошнія гады беларускі рубель адносна стабільны, у беларусаў за дзесяцігоддзі склалася звычка ўсе буйныя пакупкі лічыць у далярах.
А ў выпадку з імпартнымі таварамі, у тым ліку аўтамабілямі, такі падыход наогул выглядае лагічным, паколькі, апроч айчынных Geely/Belgee, якія маюць фіксаваную цану ў рублях, астатнія аўто імпартуюць з іншых краін.
Калі гаворка ідзе пра імпарт з трэціх краін, то машыну трэба размытніць, і мытныя стаўкі прапісаны ў еўра, а не ў беларускіх рублях.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі10
Каментары