Buduć pierahledžanyja navučalnyja prahramy dla pieršych, piatych i dziasiatych kłasaŭ
U novym navučalnym hodzie ŭ pieršych, piatych i dziasiatych kłasach buduć ukaranionyja novyja navučalnyja prahramy i typavyja navučalnyja płany, paviedamiła na pres-kanfierencyi 9 krasavika ŭ Minsku namieśnik ministra adukacyi Raisa Sidarenka.
«Praz hod pa novych navučalnych płanach i novych prahramach buduć pracavać užo 5-y i 6-y, na treciaj stupieni — 10-y i 11-y kłasy. Takim čynam, pastupova, płaŭna, na praciahu piaci hadoŭ my vyjdziem na adnosnuju zavieršanaść bazavaj adukacyi. I tady my jašče raz pierahledzim navučalnyja prahramy ŭ 10-11-ch kłasach», — skazała jana.
Pa słovach namieśnika ministra, u ciapierašni čas bazavaja adukacyja nie daje vučniam poŭnuju karcinu ab niekatorych pradmietach, da prykładu, navučalnaja prahrama pa historyi ŭ 9-m kłasie zakančvajecca na Kastryčnickaj revalucyi 1917 hoda.
«Kali paśla 9-ha kłasa vypusknik prymaje rašeńnie, što nie pojdzie ŭ VNU, a praciahnie navučańnie va ŭstanovie prafiesijna-techničnaj adukacyi, to, vychodziačy z 9-ha kłasa, pa ŭsich vučebnych pradmietach jon pavinien mieć adnosna poŭnuju karcinu ab hetym pradmiecie», — adznačyła jana.
«Kab pazbavicca ad takich niehatyŭnych momantaŭ, usie navučalnyja prahramy buduć pierahledžanyja, — skazała Sidarenka. — Ale heta nie značyć, što zaraz my budziem niešta łamać, uvodzić niejkija novyja schiemy. Hetaha nie budzie».
U navučalnych prahramach pieršych kłasaŭ praktyčna nie ŭnosiacca źmieny, a ŭ piatych kłasach źmianieńni zakranuć novy pradmiet «Ajčynnaja i suśvietnaja mastackaja kultura», adznačyła namieśnik ministra.
«Płanujem vykładańnie hetaha pradmieta pa modulnym pryncypie, z ulikam uzrostavych asablivaściaŭ. Naprykład u piatym kłasie jon budzie bolš źviazany z pradmietami «Malavańnie», «Muzyka», a ŭ dziaviatym kłasie my, viadoma, vyjdziem na inšy ŭzrovień», — adznačyła Sidarenka.
Pavodle jaje słoŭ, novy pradmiet buduć vykładać raniejšyja nastaŭniki suśvietnaj mastackaj kultury, a taksama piedahohi, u jakich hety pradmiet byŭ nie asnoŭnym, ale jany taksama mohuć vieści zaniatki.
U 10-ch kłasach u novym navučalnym hodzie budzie dastupna vyvučeńnie pradmietaŭ jak na bazavym, tak i na pahłyblenym uzroŭni.
Kamientary