Агулам амаль 17 гадоў калоніі: у Гомелі палітвязня асудзілі другі раз за паўгода
У Гомельскім абласным судзе 3 студзеня вынеслі другі за паўгода прысуд у дачыненні да 34-гадовага палітвязня Андрэя Паднябеннага, паведамляе «Вясна».
Ён мае расійскае грамадзянства, але з шасці гадоў жыве ў Беларусі і мае від на жыхарства. Першы раз Андрэя асудзілі да 15 гадоў калоніі ва ўмовах узмоцненага рэжыму па шэрагу цяжкіх артыкулаў Крымінальнага кодэкса Беларусі, у тым ліку за «акт тэрарызму» за падпал машыны начальніка Упраўлення дэпартамента выканання пакаранняў.
Цяпер Андрэя судзілі па чатырох крымінальных артыкулах, у тым ліку за «садзейнічанне экстрэмісцкай дзейнасці» і «распальванне іншай сацыяльнай варожасці».
У выніку да 15 гадоў зняволення яму дадалі яшчэ год і восем месяцаў калоніі ва ўмовах узмоцненага рэжыму.
Акрамя гэтага, палітвязня аштрафавалі на 1000 базавых велічыняў (37 000 рублёў). Справу ў закрытым рэжыме разглядаў суддзя Руслан Царук.
Андрэя затрымалі 5 лістапада 2021 года і змясцілі пад варту. Амаль месяц ён быў у СІЗА КДБ у Мінску, потым яго перавялі ў СІЗА-1, а з 15 снежня 2021 года і да гэтага часу Паднябенны знаходзіцца ў гомельскім СІЗА-3.
23 траўня 2022 года КДБ унёс Андрэя ў «спіс асобаў, датычных да тэрарыстычнай дзейнасці».
30 чэрвеня палітвязня асудзілі да 15 гадоў калоніі паводле ч. 1 арт. 14 і ч. 3 арт. 218 (замах на наўмыснае знішчэнне альбо пашкоджанне чужой маёмасці), ч. 1 арт. 361-1 (стварэнне экстрэмісцкага фарміравання), ч. 1 і ч. 2 арт. 289 Крымінальнага кодэкса (акт тэрарызму) за падпал машыны начальніка Упраўлення дэпартамента выканання пакаранняў, пракол колаў у 39 тралейбусаў, стварэнне і адміністраванне тэлеграм-канала і чата, якія прызналі экстрэмісцкімі фарміраваннямі, а таксама за падпал крана на будоўлі ў 2019 годзе. Прысуд вынес суддзя Анатоль Сотнікаў.
Цяпер чытаюць
Расійскія прапагандысты выдумалі ўдар дрона па турыстычным аўтобусе. Але ў гісторыі ёсць загадкавыя фуры3
Каментары