Тэрмін у карцары Ціханоўскаму працягнулі за «неналежную ўборку» — пад столлю знайшлі павуцінне
Сяргею Ціханоўскаму працягнулі тэрмін знаходжання ў карцары за неналежную ўборку памяшкання — супрацоўнікі СІЗА знайшлі пад столлю павуцінне. Пра гэта Tut.by распавёў адвакат Сяргея Ціханоўскага Віктар Мацкевіч.
Сяргей Ціханоўскі знаходзіцца ў карцары ўжо 10 дзён. Па словах адваката, Ціханоўскаму далі два спагнанні, кожнае — па сем сутак знаходжання ў карцары. Першае спагнанне вынеслі, калі ён яшчэ знаходзіўся ў звычайнай камеры, за парушэнне рэжыму. Другое — калі ён ужо знаходзіўся ў карцары, за дрэнную ўборку памяшкання: са слоў Ціханоўскага, у камеры пад трохметровай столлю супрацоўнікі СІЗА выявілі павуцінне.
Сёння Ціханоўскі падаў скаргі на змяшчэнне ў карцар у суд Маскоўскага раёна, у пракуратуру горада і Упраўленне дэпартамента аб выкананні пакаранняў па Мінску і Мінскай вобласці.
— Сяргей не падае духам, але кажа, што ўмовы ў карцары дрэнныя: там няма пітной вады, толькі вада з крана, не вельмі чыстая. Карцар — памяшканне маленькае, без акна, яно не праветрываецца, кругласутачна гарыць яркае святло — святлодыёдная лямпа, у памяшканні вільготна — у камеры праходзіць стаяк, і труба стаяка працякае, таму бетонная падлога пастаянна мокрая. Нармальна сядзець фактычна няма на чым, а ложак адкідваюць толькі на ноч з 22 да 6 гадзін раніцы. Таму Сяргею даводзіцца шмат стаяць або рабіць невялікія крокі па карцары. Але ў яго баліць нага, якую ён траўміраваў яшчэ да затрымання, таму хадзіць і стаяць яму складана, — кажа абаронца Віктар Мацкевіч.
Адвакат блогера падаў зварот начальніку Следчага ізалятара №1 аб неналежных умовах утрымання, у якім просіць правесці медыцынскі агляд Ціханоўскага і скараціць тэрмін яго знаходжання ў карцары.
— Таксама я быў у пракуратуры Мінска і падаў зварот, у якім прасіў аб неадкладным разглядзе ўсіх пададзеных скаргаў. Спадзяюся, што іх разгледзяць у тэрміновым парадку і сітуацыя будзе выпраўлена, — сказаў абаронца.
Ніякіх працэсуальных дзеянняў з Ціханоўскім, пакуль ён знаходзіцца ў карцары, не праводзілася.
Нагадаем, Сяргея Ціханоўскага адправілі ў карцар 13 чэрвеня. 20 чэрвеня працягнулі знаходжанне ў карцары да 26 чэрвеня.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне12
Каментары