Расія перайшла на выкарыстанне сухапутных маршрутаў праз усходнюю частку Украіны для забеспячэння лініі фронту і перастала эксплуатаваць мост праз Керчанскі праліў, піша The Independent.
Спадарожнікавыя здымкі, якія прааналізавала і перадало выданню найбуйнейшае ўкраінскае прыватнае разведвальнае агенцтва Molfar, паказалі, што
апошнія тры месяцы па мосце не ходзяць вайсковыя грузавыя чыгуначныя саставы. З 29 лютага быў заўважаны толькі адзін расійскі грузавы цягнік з 55 вагонамі з палівам.
Адзначаецца, што Масква значна скараціла выкарыстанне Крымскага моста пасля атакі на яго 17 чэрвеня 2023 года. Тады ўкраінскія марскія дроны змаглі пашкодзіць частку палатна, два чалавекі загінулі.
Са слоў генеральнага дырэктара Molfar Арцёма Старасека, рашэнне расійскіх уладаў спыніць выкарыстанне моста супала з рэзкім ростам грузавых перавозак праз Тамань у Растоўскай вобласці.
Паводле ягоных слоў, Расія пачала пракладаць новыя чыгуначныя веткі на акупаваных тэрыторыях, а менавіта ў Мелітопалі, Бярдзянску і Марыупалі, каб звязаць Крым з Расіяй сухапутным шляхам.
Новая чыгуначная лінія, якая праходзіць ад Мелітопаля да Бярдзянска і Марыупаля, а затым да Растова-на-Доне, верагодна, будзе выкарыстоўвацца расійскімі войскамі для новага наступлення, якое, як многія чакаюць, пачнецца гэтым летам, удакладняе выданне.
Цяпер чытаюць
Мужчына ў мінскім метро лапаў дзяўчат, з выгляду падлеткаў, і паказваў ім пахабныя жэсты. Яго затрымалі4
Каментары