«Нас чакае працяглы шлях. Неабходнае абмеркаванне далейшай макраэканамічнай палітыкі ў Беларусі».
Міжнародны валютны фонд пакуль не абмяркоўваў аб’ёмы фінансавай дапамогі Беларусі ў межах магчымай новай праграмы супрацоўніцтва. Пра гэта заявіў кіраўнік місіі МВФ па Беларусі Крыс Джарвіс 13 чэрвеня на брыфінгу ў Мінску.
«Мы пачалі перамовы аб магчымай новай праграме. Нас чакае працяглы шлях. Неабходнае абмеркаванне далейшай макраэканамічнай палітыкі ў Беларусі. Нам таксама неабходна дамовіцца пра структурныя пераўтварэнні, каб забяспечыць эфектыўнасць прадпрыемстваў і фінансавай сістэмы, за кошт чаго ў далейшым можна выйсці на ўстойлівыя і высокія тэмпы росту», — сказаў Джарвіс.
Ён падкрэсліў, што дзяржаўныя органы павінны з усёй рашучасцю ісці на эканамічныя і структурныя пераўтварэнні.
Пакуль ні пра якія тэрміны пачатку рэалізацыі праграмы дамоўленасцяў не было. Разам з тым, на думку Джарвіса, у цяперашніх умовах «неабходна дзейнічаць як мага хутчэй, каб дабіцца стабілізацыі эканамічнай сітуацыі ў краіне».
Што тычыцца аб’ёмаў магчымай дапамогі,
то ў межах цяперашняга візіту місіі істотных перамоў па гэтым пытанні не адбывалася.Як растлумачыў Джарвіс, гэта звязана з тым, што аб’ём такой дапамогі будзе залежаць ад стану і патрэбнасці плацежнага балансу Беларусі, а таксама ад сур’ёзнасці тых мерапрыемстваў, якія будуць прадугледжаныя праграмай.
«Мы не так далёка прасунуліся ў нашых перамовах, каб абмяркоўваць аб’ёмы фінансавай дапамогі», — зазначыў кіраўнік місіі МВФ.
Ён падкрэсліў неабходнасць узгадніць сур’ёзныя захады ў сферы структурных пераўтварэнняў і макраэканамічнай палітыкі да пачатку рэалізацыі праграмы. «Мы таксама павінны быць упэўненыя ў тым, што ўсе зацікаўленыя бакі — прэзідэнт, урад і Нацыянальны банк — поўныя рашучасці гэтую праграму выконваць. І тут вельмі важны адзіны падыход», — падкрэсліў Джарвіс.
Паводле яго слоў, новая праграма супрацоўніцтва з Беларуссю можа быць разлічаная на тры гады. У ліку ўсяго ў банкаўскай сферы Беларусі неабходна будзе забяспечыць фарміраванне добра працуючага Банка развіцця, на які ляжа выдзяленне новых крэдытаў у межах дзяржпраграм, якія зараз па субсідаваных стаўках выдаюцца камерцыйнымі банкамі.
У сферы прыватызацыі вялікую ўвагу МВФ рэкамендуе надаць стваранаму Нацыянальнаму агенцтву па інвестыцыях і прыватызацыі. «Мы мяркуем, што гэта будзе спосабам дамагчыся максімальна эфектыўнай прыватызацыі прадпрыемстваў з максімальнай аддачай для краіны», — зазначыў Джарвіс.
Апрача таго, паводле яго слоў,
ёсць і больш шырокая тэма — рэформа прадпрыемстваў.«На гэтым этапе мы знаходзімся на вельмі ранняй стадыі перамоў па гэтым пытанні. У цэлым мы лічым, што ў адносінах да прадпрыемстваў дзейнічае вельмі вялікі пералік планавых паказчыкаў, якія іншы раз супярэчаць адзін аднаму. Мы б хацелі, каб у прадпрыемстваў была большая свабода дзеянняў і больш стымулаў, каб працаваць рэнтабельна і прыбыткова», — растлумачыў кіраўнік місіі МВФ.
Адказваючы на пытанне, які ўплыў на выдзяленне крэдыту можа аказаць палітычнае становішча ў краіне, кіраўнік місіі фонду заявіў,
што «МВФ не выстаўляе палітычных умоў для сваіх крэдытаў».Пры гэтым Джарвіс зазначыў, што на пасяджэнні выканаўчага савета МВФ у сакавіку гэтага года было заяўлена аб гатоўнасці падтрымаць Беларусь пры ўмове правядзення сур’ёзнай праграмы эканамічных і структурных рэформ. «З таго часу пытанне па Рэспубліцы Беларусь на пасяджэнні выканаўчага савета МВФ не ўзнімалася, таму ніякай новай інфармацыі ў мяне няма», — зазначыў Джарвіс.
Цяпер чытаюць
Свецкае жыццё Дар’і Шманай: дні нараджэння дзяцей Кіркорава і Comedy Club8
Каментары