У Віцебску праходзіць выстава гравюр і літаграфій па матывах творчасці Рафаэля
Унікальную выставу, сабраную з гравюр і літаграфій па матывах творчасці Рафаэля Санці, створаных у XVI-XIX стагоддзях, прадставілі ў Мастацкім музеі Віцебска, які з’яўляецца філіялам Віцебскага абласнога краязнаўчага музея, піша расійскае выданне Sputnik.
«Прынц усіх жывапісцаў»
Рафаэль Санці — адзін з трох тытанаў эпохі Адраджэння нароўні з Леанарда да Вінчы і Мікеланджэла Буанароці. Нягледзячы на тое, што мастак пражыў усяго 37 гадоў, ягоны ўклад у сусветную культуру немагчыма пераацаніць.
За сваё нядоўгае жыццё Рафаэль паспеў не толькі стаць знакамітым жывапісцам, якому заказвалі карціны самыя вядомыя сем'і той эпохі, але і галоўным архітэктарам рэканструкцыі сабора Святога Пятра і першым археолагам антычнага Рыма. Таксама ён распісаў знакамітыя лоджыі Ватыкана.
У сваёй творчасці ён не толькі абапіраўся на хрысціянскія сюжэты, але і натхняўся антычнымі вобразамі. Па сутнасці, мастак аб'яднаў у сваіх малюнках антычную міфалогію і новы хрысціянскі светапогляд.
Гравюры і літаграфіі
Яшчэ пры жыцці майстра яго сучаснікі ў 1530—1560 гадах стваралі гравюры да ягоных ілюстрацый навелы Апулея «Амур і Псіхея». 30 адбіткаў з гэтых гравюр, створаных на медных пласцінах у 1774 годзе, прадстаўленыя на выставе ў Віцебску.
Экспазіцыя складаецца з 92 работ: гэта і гравюры па ілюстрацыях навелы, і 52 літаграфіі з фрэсак лоджый Ватыкана.
Роспіс лоджый Ватыкана, — гэта, бадай, адна з найбольш манументальных работ мастака. Рафаэль стварыў на плафонах кожнага з 13 скляпенняў лоджый па чатыры фрэскі, якія ілюструюць розныя тэмы казанняў на тэмы Старога і Новага запавету. Усяго атрымалася 52 фрэскі — столькі ж, колькі і тыдняў у годзе.
У Каталіцкай царкве ёсць традыцыя штотыднёвых казанняў для грамадзян Рыма, пасля якіх яны маглі пайсці і паглядзець адпаведную «ілюстрацыю» ў лоджыях Ватыкана. Рафаэль стварыў моцныя, ясныя і зразумелыя фрэскі, кожная з якіх сама можа расказаць гісторыю.
У 1866 годзе выдатны гравёр і мастак Людвіг Грунер сумесна з вядомым італьянскім мастаком Ніколам Кансоні выканалі 52 танаваныя літаграфіі з фрэсак вялікага фармату ў стылі старадаўняй гравюры на дрэве XVI стагоддзя. У поўным аб'ёме гэтыя літаграфіі на выставе прадстаўленыя ўпершыню.
Трэці блок работ — серыя гравюр з малюнкаў купала капэлы Кіджы, таксама створаная Людвігам Грунерам. У гэтай серыі малюнкаў Рафаэль аб'яднаў антычнае ўяўленне пра планеты і хрысціянскую міфалогію, паказаўшы, як анёлы рухаюць планеты па загадзе Госпада.
Па сутнасці, літаграфіі, як і гравюры — адзін з самых значных метадаў масавага капіявання і тыражавання твораў мастацтва, якія існавалі да вынаходства фатаграфіі і капіра.
«Разцовыя гравюры, літаграфіі дазвалялі папулярызаваць жывапісныя і манументальныя творы мастацтва. Гравёр таксама ўносіў частку свайго майстэрства і бачання, бо трэба было не толькі паўтарыць і захаваць прапорцыі арыгінала, але і стварыць выразную кампазіцыю», — патлумачыла старшая навуковая супрацоўніца Мастацкага музея Алена Крывенькая.
Перасоўную выставу «Рафаэль. Эпоха Рэнесансу» прывезла ў Віцебскі мастацкі музей маскоўская кампанія «Артгіт». Гравюры і літаграфіі для выставы былі сабраныя з прыватных калекцый Вялікабрытаніі і Германіі. Гэтая экспазіцыя, паводле слоў Алены Крывенькай, — адзіная магчымасць убачыць такі вялікі збор у адным месцы.
Экспазіцыя будзе працаваць да 14 чэрвеня.
«Калі ўжо быць — дык быць як маяк!» У Варшаве адбыўся канцэрт Максіма Знака
Цішком звольнілі дырэктара Нацыянальнага гістарычнага музея. На яго месца чакаюць адыёзнага дэпутата-камуніста Клішэвіча
У Томску знеслі помнік рэпрэсаваным: сярод іх былі дэпартаваныя з Беларусі палякі, а таксама беларусы, якіх прымушалі змяняць нацыянальнасць
Бальшавікі хацелі забудаваць Беларусь готыкай. Што засталося ад беларускага нацыянальнага стылю 1920-х?
Каментары