Другое транспартнае кальцо дапаможа зняць аўтамабільную нагрузку на цэнтр Мінска, заявіў 30 лістапада на прэс-канферэнцыі начальнік тэхнічных сродкаў і сістэм ДАІ ГУУС Мінгарвыканкама Дзмітрый Навой. Яго цытуе БелаПАН.
Паводле Дзмітрыя Навоя, адна з асноўных ідэй Дзяржаўтаінспекцыі — пусціць рух па кольцах, каб разгрузіць цэнтр сталіцы.
«Другое кальцо пабудавана так, што яго рэальная прапускная здольнасць больш за 10 тыс. аўтамабіляў за гадзіну, а ў нас і інтэнсіўнасці такой няма, — сказаў ён. — Рэальная інтэнсіўнасць па праспекце Незалежнасці — 6 тысяч, па другім кальцы — пяць. Праблема затораў — толькі ў 14 вузлах кальца. Дадаўшы на гэтых скрыжаваннях левы паварот, змяніўшы схему арганізацыі дарожнага руху, мы забяспечым там прапускную здольнасць, якая можа пасупернічаць з МКАД».
Ён прывёў як прыклад адзін з вузлоў на вуліцы Арлоўскай у раёне скрыжавання з вуліцай Чарвякова, дзе дадатковая паласа для павароту налева павялічыла прапускную здольнасць скрыжавання ў 1,5 разу.
«Нам не патрэбныя вельмі шырокія вуліцы і такія ж скрыжаванні на іх, накшталт праспекта Пушкіна, — сказаў ён. — Іх трэба чысціць, латаць, праз іх бабуля не паспявае перайсці. Усе праблемы затораў вырашаюцца таннымі і простымі спосабамі накшталт паласы левага павароту», — дадаў ён.
Акрамя таго, на думку прадстаўніка ДАІ ГУУС, такой транспартнай магістралі, як праспект Незалежнасці «ў яго сённяшнім выглядзе, у еўрапейскім горадзе наогул быць не павінна».
«Гаворка ідзе пра тое, што, калі мы робім магістраль для пропуску аўтамабіляў, там не павінна быць святлафораў і доступу пешаходаў. А калі ў нас яшчэ і хуткасць 60 км/г — гэта 100% гібелі пешахода, — растлумачыў ён. — У Еўропе на гарадскіх магістралях хуткасць 50 км/г, і ўжо маецца шанец выжыць, а ў жылых зонах яна наогул 30 км/г. Там імавернасць гібелі — 10%. Нашы ж гарады пабудаваны так, што не даюць магчымасці выжыць».
Каментары